Politico ta habri otro iniciativa di ley pa matrimonio di mesun sexo na Aruba

ORANJESTAD – Lider di partido politico Accion 21, Miguel Mansur ta cla pa presenta un iniciativa di ley pa habri matrimonio pa personanan di mesun sexo. E ta haci esaki den cuadro di e echo cu e luna aki mundialmente n  ta celebra juni como Luna di Orguyo pa comunidad LGBT+. E tema aki ta uno conoci di ta sensistivo pa nos isla, unda cu den pasado tabatin basta resistencia tanto den pueblo como Parlamento. Sr Mansur mes, cu a profila su mes como un parlamentario abiertamente homosexual. Esaki no a stroba e Parlamentario di drenta Parlamento durante e ultimo eleccion. 

A YEGA CERCA

Lo mas cerca cu a yega, manera cu Mansur ta recorda tambe. Na 2016 ex-Parlamentario Desiree Croes a propone un amienda pa introduci union civil (geregistreerd partnerschap) cu e mesun derechonan di matrimonio pa tanto parehanan di mesun sexo como esnan di sexo diferente. Parlamento di Aruba, cu 11 voto na fabor, a pasa un amienda di consenso creando union civil pero sin e derechonan igual na matrimonio. Aruba su Parlamento tabata e prome organo legislativo den Caribe pa aproba union civil pa parehanan di mesun sexo. 

CON A CUMINSA

Mansur ta recorda cu Aruba su mesun movemento di igualdad pa esnan LGBT+ a cuminsa na 2006 cu e caso Oduber-Lammers, un pareha lesbiana Arubana-Hulandes casa na Hulanda, cu a tuma accion legal pa por registra nan matrimonio localmente. Na 2007 hues a dicta cu Censo/Registro Civil lo mester registra e matrimonio Hulandes di e residentenan Arubano pero e victoria a keda simbolico paso e no a otorga ningun derecho adicional. 

Na 2021, Parlamento di Aruba cu 17 voto na fabor, a aproba implementacion di cambionan na nos codigo civil (burgerlijk wetboek) incluyendo introduccion di union civil. Desde 1 september 2021 parehanan di mesun sexo y esnan di sexo diferente por registra un union civil na Censo pero ambos ta keda falta e mesun derechonan civil cu matrimonio ta otorga. Dia 14 di oktober 2021, pareha van der Biezen-Cordoba, a marca historia como e prome pareha di mesun sexo pa entama un union civil na Aruba, celebracion di e ceremonia oficial a tuma lugar na Stadhuis. 

SITUACION ACTUAL

Actualmente parehanan di sexo diferente por scoge entre union civil of matrimonio si nan kier tur e derecho y beneficionan cu e ultimo ta otorga. Sinembargo, parehanan di mesun sexo ta limita na un union inferior sin tur e derechonan di matrimonio como unico opcion asina hancrando discriminacion. Beneficionan incluyendo asuntonan fiscal (impuesto), servicionan social y hopi mas no ta alcansabel pa parehanan den un union civil y herencia por unicamente wordo estableci atraves di un acto notarial.

PRESENTACION 

E parlamentaro ta bisa cu na juni 2022 como parti di celebracionnan di Luna di Orguyo, un iniciativa di ley pa habri matrimonio pa parehanan di mesun sexo lo ser presenta. E Miembronan di Parlamento iniciador di e ley lo firma e concepto y entrega e legislacion na Presidente di Parlamento y Griffier. Na e momento ey e trayecto legal lo cuminsa y e concepto lo ser manda inmediatamente pa Raad van Advies cu lo tuma mas o menos seis siman pa evalua y despues duna nan recomendacionnan. Despues, a base di e recomendacionnan di Raad van Advies, e ley por ser modifica y manda bek pa Raad van Advies pa un di dos evaluacion of lo keda na Presidente di Parlamento pa yama un reunion publico pa trata e ley. E ta spera cu prome cu fin di 2022, Parlamento di Aruba lo haya e oportunidad pa debati habrimento di matrimonio pa parehanan di mesun sexo. E cambio historico aki segun Mansur, ta uno increiblemente importante pa tur e beneficionan cu e ta trece, specialmente pa e salud fisico y mental di e comunidad LGBT+.