Arubiano ta bira piloto pa e aeroliña mas grandi di mundo

MIAMI – E siman aki e yiu di tera, Arubiano Anfernee Emerenciana a bira piloto pa e aeroliña mas grandi di mundo, esta American Airlines. Cu esaki, un soño di dje ta keda realisa, manera e mes a expresa e siman aki. Emerenciana ta bira piloto pa bula e avionan tipo Boeing 737 pa e aeroliña. Y e ta spera cu pronto e lo por transporta pasaheronan Arubiano riba e avionan. 

SU SOÑO Y LOGRO

Manera e mes ta bisa, for di chikito e la para na heki di aeropuerto Reina Beatrix soñando cu spera un dia e por a baha un di e avion grandi nan na Aruba. “ Cu apenas 17 aña mi a bai studia afo pa asina cuminsa cu e trajecto pa yega na e momento aki” e ta sigui conta. “E siman aki mi a bira oficialmente un piloot pa e aeroliña mas grandi di mundo, American Airlines,  bulando e Boeing 737”. E la gradici su mayornan y famia pa nan sosten durante tur aña nan aki. “Pronto mi lo por transporta pasahero nan Arubiano cu hopi orguyo ariba vuelo nan di American Airlines” e ta finalisa bisando, riba su pagina di Facebook. Ta conoci cu tin mas Arubiano bulando pa aeroliñanan internacional, pero esaki ta e prome (te asina leu cu ta conoci) cu ta traha pa e compania como piloto.