Si surgi un calamidad, Corsou lo no tin suficiente shelter

WILLEMSTAD - Si sosodé un kalamidat natural ne momentunan aki Kòrsou lo no tin sufisiente ‘shelter’ komo espasio pa akomodá hendenan ku mester a ser evakuá. Gobièrnu ta konsiente ku lo mester di konstruí mas shelter, pero meskos ku hopi otro proyekto, esaki tambe ta dependé di finansa, kual no tin muchu ne momentunan aki. Esei EXTRA por a komprondé for di deklarashon di tantu Promé Minister sr. Gilmar Pisas komo sr. Lesley Fer, ku ta e direktor di entidat nashonal pa maneho di kalamidat i krísis. T’asina ku dia 1 di yüni a temporada di orkan a inisiá ofisialmente i lo terminá na luna di novèmber 2022.

Durante un enkuentro ku prensa e siman aki dado momentu a surgi e pregunta si Kòrsou ta sufisientemente prepará, partikularmente si tin sufisiente espasio komo shelter pa akomodá hendenan ku ser evakuá. Di su parti sr. Fer a trese dilanti ku, e tin di rekonosé ku no tin sufisiente espasio, pero ta p’esei mes den seshonnan di informashon riba pasonan ku tin di tuma si presentá un kalamidat, ta konsehá tur hende pa for di adelantá hasi petishon na famianan pa posibel akomodashon si algu serio presentá. E akomodashon den shelter mester bira realmente e último opshon, pasobra den un kaso asina bo ta saka un hende kompletamente for di su ambiente pa un periodo dependiendo si despues e lo por regresá kas, dependiendo den ki estado di kas a keda.

Ne momentunan aki no tin sufisiente shelter, i ta invershonnan grandi tin di ser hasí pa konstruí shelter. I no ta solamente konstruí sino ku mester mantené nan den kondishon ku nan por ser usá mesora ora ku presentá un kalamidat. E na ora ku no konstruí mes, mester ta edifisio(nan) ku ta kumpli ku e kondishonnan apropiá pa por sirbi komo shelter. Pues pa bo tin sufisiente shelter, lo tin di hasi invershonnan hopi grandi. Tin shelter si, pero nan no ta sufisiente.

Por sierto, e servisio di Obranan Públiko ta hasiendo un evaluashon pa sa kuantu i di ki kapasidat e shelternan mester ta.

Di su parti sr. Pisas tambe a rekonosé e skarsedat di shelter, pero ku esaki tin hopi di haber ku plakanan ku no tin presupuestá pa traha shelter. E ta pendiente pa sa kiko e plachi di gastu ta bira pa asina por aloká fondonan pa konstrukshon di shelter den futuro. NOTA: Texto ta scirbi den Papiamento fonetico di Corsou.