Perret-Gentil: Ni doñonan stranhero ni mercado di vacation rental a causa aumento di costo di Vivienda

ORANJESTAD - For di algun tempo caba por a tuma nota di aumento den prijs di materialnan di construccion y varios otro actividadnan economico cu ta creando un desbalansa den e stabilidad economico di nos pais. Sr. Alberto Perret-Gentil, desaroyador di e.o. Oceania Residences, Azure, Blue Residence y Harbour House ta comparti su preocupacionnan y pensamento encuanto e ultimo desaroyonan pa cu e topico di vivienda pagabel, aumento di costo di materialnan di construccion y introduccion di e ley nobo di impuesto. 

Segun e inversionista, recientemente por a tuma nota cu mandatarionan di pais Aruba ta preocupa pa cu accesibilidad di vivienda pa e famia rubiano door di doñonan extranhero y/of e industria di vacation rental. Perret-Gentil ta opina cu no por mescla e dos tipo di mercado aki cu otro. “Na prome luga nos tin di separa e comportamiento di e mercado turistico y e mercado di clase medio/halto cu e mercado di vivienda accesibel como cu ambos tin elementonan diferente y ta comporta tambe diferente,” Perret-Gentil ta splica. Por tuma nota di diferente factornan cu ta contribuyente na e aumento di prijs di vivienda y di costo di construccion. Por ehempel, costonan di construccion na Aruba semper tabata entre 30% pa 40% mas halto cu Merca door di diferente motibonan relata cu costonan halto di importacion, productividad di labor abou, monopolio riba cierto materialnan y construccion en general, tarifa di interes mas halto y retraso den permiso debi na burocracia. 

AUMENTO DEN PRIJS DI VIVIENDA NA ARUBA

E aumento den prijs di vivienda segun Perret-Gentil ta debi principalmente na e aumento di 35% di costonan di construccion den e ultimo aña, pa motibonan fuera di alcance di Aruba, entre otro ceramento di fabricanan y ‘ports’ debi na pandemia di Covid-19 y e guerra comercial. 

Den caso di e segmento halto y intermedio di vivienda, prijsnan ainda tin di wordo ahusta na e dicho aumento aki. Ambos mercado como local y internacional ta na altura di esaki, y pues ta probecha di e oportunidad temporario aki. Perret-Gentil ta remarca cu den e mercado medio y halto aki, tin poco inventario nobo disponibel y un demanda mas halto debi na e prijsnan di benta cu ainda falta pa wordo adapta na e aumento di costo di construccion. E tendencia di ‘flexworking’ tambe ta contribuyente na e demanda. Ta hopi mas miho pa traha for di Aruba cu e miho internet den e calor di Caribe cu traha for di e frieuw den winter di New York. Real estate semper ta un bon inversion y ta protega bo mes for di inflacion. 

E moratorio riba construccion di hotel y condominio imponi door di gobierno di Aruba den opinion di Sr. Perret-Gentil, ta e eror di mas grandi cu por a wordo cometi; cual ta solamente agrega mas problema y restriccion pa cu e suministro di material, y cu por lo tanto lo pone e prijsnan sigui aumenta. E control den prijs of di e cantidad, mayoria di biaha tin consecuencianan adverso. Ta hopi mas mihor pa laga mercado auto genera esaki pa su mes. 

CAMBIA ENFOKE Y RESOLVE PROBLEMA DI VIVIENDA

E problema cu mercado ta wordo influencia, no ta na e cantidad di extranhero cu tin cas na Aruba, ni tampoco e casnan cu ta wordo uza pa vacation rentals. Segun Perret-Gentil, e efecto cu esakinan ta trece pa cu e mercado ta uno insignificante. “E problema ta e falta di suministro di material nobo y cu e retraso temporal di ahustacion di prijsnan. Fuera di problemanan di logistica, na Aruba tin un problema di retraso na DIP y DOW cu ta rekeri atencion debidamente. Aruba su maneho y regulacion di otorgamento di tereno, permiso di contruccion y hopi otro aspecto mas mester wordo revisa,” Perret-Gentil ta añadi.

E caida di e mercado di “stock” conhuntamente cu e aumento di e tarifa di interes ta loke cu a reduci e liheres di benta. Segun e desaroyador, e enfoke primordial di Gobierno mester ta pa resolve e problema di vivienda accesibel pa e localnan, cual no tin nada di haber cu compra di vivienda door di extranheronan ni tampoco debi na e industria di vacation rentals na Aruba.

CONSTRUCCION DI VIVIENDANAN SOCIAL

E Gobierno segun Perret-Gentil , a dicidi corectamente pa sigui construi vivienda accesibel/social vertical como cu ta un hecho cu no tin hopi tereno mas pa casnan familiar pa tur local. Apesar cu localnan no ta gusta biba den apartamentonan of condominio, e generacion nobo eventualmente lo sigui tendencianan mundial y lo disfruta di e beneficionan di biba den proyectonan di condominio of apartamento. 

Perret-Gentil ta cuestiona cuanto proyectonan di casnan social a wordo construi den e ultimo 10 añanan. “Mi no tin datonan exacto, pero mi por a tuma nota cu no tin suficiente,” segun Perret-Gentil. Yega na un propio cas ta birando un soño inalcansabel pa hopi rubiano pa motibo di costonan halto di tereno y construccion, cual cu introduccion di e BTW lo bay bira practicamente impagabel pa e famia humilde. Mester realisa cu ningun inversionista lo inverti den proyectonan di casnan social, cu gastonan halto di construccion y e introduccion di BTW. Awendia gastonan di construccion ta mas halto cu prijsnan di benta di cas. Claramente e problema di vivienda pagabel ta e falta di maneho y regulacion cu mester inclui componentenan di subsidio pa e cumprado y incentivanan adecua pa desaroyadornan priva. 

Recientemente Perret-Gentil por a tuma nota di un proyecto di ‘housing’ di un compania priva. Alberto a comenta cu e proyecto di ‘housing’ ta uno hopi bunita y sigur den un bon direccion pa cu diversificacion den tipo di vivienda entre localnan. “Sin duda algun locual Aruba tin mester. Pa cu e aspecto di genera ganashi, como inversionista, mi no ta comprende e ‘business model’ cu ta wordo aplica mirando e prijsnan di benta di un propiedad, sin ricibi subsidio directo for di Gobierno sea den tarifa di interes of den prijs. Mi ta deseanan tur clase di exito pa cu e proyecto,” Perret-Gentil ta opina.

ALTERNATIVANAN PA CU E MERCADO DI “YOUNG PROFESSIONALS”.

E mercado di “young professionals” local ta keda un mercado interesante. Segun Perret-Gentil e tendencia mundial ta indica cu hobennan profesional ta muda pa biba den centro di ciudad. Esey sigur ta un opcion pa Aruba tambe unda cu por converti edificionan comercial existente den apartamentonan pa e mercado di “young professionals” y studiantenan. “Imagina un Oranjestad cu varios café’s y restaurant y cu vivienda parti ariba di edificionan, creando un sentido di comunidad hoben y vibrante pa nos centro di ciudad,” segun Perret. Por tuma ehempel manera Hulanda, Spaña, Merca y Latino America. Aruba sigur tin hopi potencial pa sigui desaroya riba e tereno aki, pero mester tin cooperacion mutuo di inversionistanan priva y Gobierno. “Importante ta cu mester tin e boluntad pa traha hunto y tuma accionnan necesario y liher, enbes di plannan cu ta tarda añanan largo pa por yega na ehecucion,” Perret ta enfatisa. Tin hopi opcionnan creativo cu Gobierno por considera, manera por ehempel incentivanan fiscal pa profesionalnan hoben por muda y biba den centro di ciudad cual lo contribui na revitalisacion di Oranjestad y di nos economia. 

E IMPACTO DI E LEY NOBO DI IMPUESTO RIBA “REAL ESTATE” 

E introduccion di e ley nobo di BTW lo bay tin un impacto grandi riba e industria di real estate segun Perret-Gentil. Cu e BTW ta wordo cobra na aduana, ta un decision corecto segun Perret-Gentil, pero sigur esaki lo tin su impacto riba costonan di material. Cu entrada di e BTW, e impuesto di transferencia di benta di propiedad mester wordo reduci considerablemente, of wordo kita completamente. E dos impuestonan aki hunto ta un combinacion peligroso, cu si wordo mescla, prijsnan di vivienda lo explota.

E desaroyador ta di opinion cu Gobierno tin di pone enfasis den legislacion di viviendanan pagabel y laga sector priva haci su trabou di sigui inverti den Aruba y su economia. “Pa chikito cu Aruba por ta, nos ta rico na experencia y acceso na conocimento for di Latino America manera por ehempel ‘Inter American Federation of Construction’ (FIC), cu nos por tuma como ehempel y siña for di dje. Kita e moratorium y laga economia di Aruba move. Miho mas inversion y crecemento sostenibel, en bes di mas impuesto,” Alberto a finalisa bisando.