Gobierno a aclaria: Hernandez lo dirigi Arubahuis pa solamente 3 luna

DEN HAAG – E nombracion di ex director di Asuntonan Social di Aruba Glenda Hernandez, ta pa ‘apenas 3 luna’. Asina gobierno a ‘aclarea’ diahuebs mainta den un intento posiblemente pa mitiga e critica cu e persona aki a haya e funcion menciona, siendo cu e lo a caba baha cu pension. Un dia prome, un comunicado for di Hulanda (cu noticiacla a publica tambe) , a simplemente ‘anuncia’ cu e persona aki lo a bira e proximo director di Arubahuis, pero no a clarifica cu ta solamente pa 3 luna. E interesante ta cu den e ‘cabez’ di e articulo ta papia di director solamente pero den e articulo ta papia di director a.i. (osea interino), pero tee y. 

ACLARIA 

Esey a crea hopi reaccion ora cu e portal aki a publica e noticia ayera. Awe, un dia despues segun e aclariacion for di Aruba e biaha aki, ‘ya pa algun siman caba, Arubahuis ta sin director y gobierno di Aruba pa e motibo aki a dicidi pa apunta un persona cu tin experiencia den maneha Departamentonan di Gobierno pa structura e organisacion di Arubahuis’, e comunicado ta sigui bisa.

E COMUNICADO DI HULANDA

E comunicado di Hulanda di ayera, mientras enberdad ta papia di cu Hernandez ‘reforsa e organisacion y yuda den e transision cu pa reforsa e organisacion y yuda den e transicion cu Arubahuis ta pasando den dje na e momento aki y cu esaki principalmente ta encera e decision cu Arubahuis ta bai muda pa un periodo temporal na un otro localidad” e comunicado ey ta sigui bisa. Pero ningun caminda ta para cu e trabou lo ta pa solamente 3 luna. 

TRES LUNA

E comunicado di awe, ta papia palabra mas cla. “ Señora Hernandez a wordo pidi pa restructura e organisacion Arubahuis pa 3 luna” e ta bisa specificamente. “Den e periodo aki ,- e comunicado ta sigui bisa -, Arubahuis lo muda y e proceso pa haya un director nobo lo encamina den e periodo aki tambe” . E procedura di ‘werving en selectie’ lo cuminsa pronto y lo publica un anuncio pa esnan interesa den e posicion aki na Hulanda, por solicita. 

PENSION

No ta haci mencion cu Hernandez a baha cu pensioen na Aruba, pero cu Hernandez, ‘recientemente a termina su contract di trabou na Aruba pa bay establece bek na Hulanda’. Y ademas ta bisa cu e la keda apunta den e cuadro aki, mirando e experiencia y conocemento cu señora Hernandez tin den maneho di departamentonan di Gobierno na Aruba”. 

IMPORTANTE

Gobierno ta spera cu pronto e procedura pa yega na un director nobo por wordo anuncia den medio di comunicacion y tambe ta spera cu tin suficiente interes pa yega na un bon director pa Arubahuis.