Gobierno di Corsou lo sigui negosha cu Caribbean Petroleum Refinery

WILLEMSTAD - Conseho di Minister di Kòrsou a aprobá di forma integral e proposishon di direktor di Refineria di Kòrsou (RDK) pa un ‘preferred bidder’ pa drenta e proseso di negosiashon pa manehá Kòrsou su refineria. Asina gobièrnu a informá ayera ofisialmente. For di nos informantenan EXTRA a komprondé ku esun ku a haña preferensia ta “Caribbean Petroleum Refinery”. Tambe e nòmber di Luis Giusti a kai.

Mas aleu gobièrnu ta informá ku, importante pa Konseho di Minister ta pa e proseso statutario ku ta sigui awor kana segun prosedura. Esaki ta enserá  ku lo tin un reunion di akshonista di RDK pa informá tantu hunta di komisario, komo direktor di RDK di e posishon di akshonista di RDK.

Gobièrnu di Kòrsou ta spera ku tur partido envolví den e trayekto aki por traha huntu, basá riba e desishon aki,  pa yega mas pronto posibel na un operador nobo, pa nos refineria por habri pa produsí kuponan di trabou pa nos pueblo.

Den deklarashon na prensa lokal, Promé Minister sr. Gilmar Pisas a duna di konosé ku konseho di minister di Kòrsou a duna RdK e enkargo pa hasi loke ta yama “head hunting” i komo resultado di e proseso ei a presentá e kandidato preferensial.

T’asina ku konseho di minister a akseptá e proposishon i awor lo bai tin reunionnan segun e prosedura.

RdK i gobièrnu no tabata riba e mesun liña inisialmente, pero tin di respetá e resultado dje enkargo ku e entidat aki a haña. E siguiente pasonan lo bira kalkulashon di otro rekisitonan pa por yega na un Memorandum of Understanding (MoU) i despues e Heads of Agreement (HoA) i sigui ku e negosiashonnan i finalmente yega na un akuerdo pa operá e refineria.

Lo tin di traha riba detayenan hurídiko, benefisionan fiskal (tax holiday), tambe tene kuenta ku aspektonan di medioambiente. Segun e mandatario, e ta kere i spera ku denter di dos luna lo mester a yega hopi leu te ku ta firma un HoA, pasobra e komunidat aki no por sigui warda mas. NOTA: E texto ta scirbi na Papiamento fonetico d Corsou.