CAFT a desaproba 3 miyon extra cu gobierno a prespuesta pa Serlimar

ORANJESTAD – E decision di gobierno (lesa: minister Ursell Arends) pa duna Serlimar Sui Generis un extra 3 miyon,- fuera di e 22 miyon annual presupuesta caba -, no a cay den bon tera cerca e colegio di supervision financiero CAFt. De echo, den nan ultimo conseho publica e siman aki, nan kier pa gobierno kita e suma ey di e presupuesto 2022 y mas aun, gobierno stop tur subsidio pa e compania. 

DI CONSEHA PA EXIGI

Si den pasado, CAFt, manera nan mes ta bisa den e reaccion aki, CAFt a ‘recomenda den tanto 2019 y 2020 pa Serlimar resolve e problemanan interno di e compania incluyendo cobransa atrasa, e biaha aki a bisa gobierno pa ‘exigi’ di Serlimar pa regla e asunto aki awor si. “Esaki pa evita cu gobierno mester saca extra suma di presupuesto pa yuda (Serlimar)”. Ademas, CAft ta ‘conseha’ gobierno pa stop di subsidia e deficit financiero di Serlimar. 

SURSEANCE VAN BETALING

Serlimar Sui Generis obviamente no por su so, y awor a haya extra bida despues cu recientemente Corte a duna Serlimar te otro aña augustus pa regla su asuntonan financiero, extendiendo e ‘surseance van betaling’ te otro aña augustus (2023). Gobierno den e caso aki, a haci un intento pa yuda e compania extra door di presupuesta 3 miyon extra pa e compania, pero esaki awor ta wordo rechasa pa e colegio di supervision financiero. 

REACCION MINISTER 

E portal aki a pidi e mandatario en cuestion, Ursell Arends, pa un reaccion pero te ainda esaki no tabata exitoso.