Alonso Tromp a keda eligi como presidente pa sindicato TOPA

ORANJESTAD – Conocido persona den comunidad Alonso Tromp a keda eligi diamars anochi como e proximo presidente di e sindicato di Trahadonan Organisa den Sector Publico di Aruba (TOPA).  For di e 205 voto valido cu tabatin, 147 a bay pa Tromp, mientras cu 58 a bay pa e otro candidato Maria Caster. Na final, tur esnan cu tabata presente na e sede, a felicita Tromp. A compronde cu un di e motibonan cu e la haya asina hopi voto, ta cu, contrario na e presidente saliente Bernabela, Tromp si kier uni cu e grupo di sindicato bringando pa revoca e recorte salarial di 12.6%. Publicamente, Tromp a vocifera cu e kier pa tin mas comunicacion entre miembro y directiva, ya cu esaki tabata un di e problemanan cardinal di e sindicato, y tambe transparencia den loke ta sosode den e sindicato.