Merca ta recorda 17 aña di desaparicion di Natalee Holloway awe

MOUNTAIN BROOK – Awe ta 17 aña pasa cu e Mericano Natalee Holloway di 18 aña e tempo ey, a ‘disparce na Aruba’, y cu a pone Aruba riba mapa internacional den un forma negativo. For di e tempo ey, particularmente na Merca, cada aña ta recorda e echo aki, y aki aya ta habri e caso of simplemente publica informacion rond di e tema pa wanta e caso ‘na bida’. Awe no ta exepcion unda cu varios medio a opta atrobe pa ‘recorda’ e caso aki, manera canal WVTM 13, filial di NBC a haci. Nos ta 17 aña mas leu, y e unico cos cu a cambia ta cu e sospechoso principal, conocido persona Joran vd Sloot ta encarcela pero na Peru, pa un otro caso, e biaha aki e asesinato di un dama peruana, 5 aña despues cu Holloway a disparce na Aruba. Mientrastanto periodista y abogado Greta van Susteren recientemente a bin den noticia cu informacion cu e lo tin datos importante di e caso pero cu e kier topa autoridad Arubiana na un oficina di FBI na Miami. E tramitenan ta wordo haci pa esaki tuma lugar.