Comediantenan Mike Epps y Chase Anthony a habri Soul Beach Festival na Aruba

ORANJESTAD – Dilanti un publico di entre mil pa 2 mil persona, e prome anochi di e di 20 edicion di Soul Beach Music Festival a cuminsa diabierna anochi. E prome anochi di custumber ta di comedia. Aki, artistanan manera Chase Anthony y Mike Epps tabata e artistanan estelar, presenta pa Chris Spencer y acompaña pa DJ Outkast y Gee Money di St Maarten. Renaissance Arena a pone 2500 stul, y mayoria tabata yen, calculando cu tabatin por lo menos algo mas cu 2 mil persona presente e anochi inicial. E festival ta continua diasabra cu e artista principal Mary J. Blidge cu na 2017 a bishita Aruba y e festival pa di prome biaha. Tambe tin artista Kevin Ross y localmente Ami Mendez, cu lo tuma lugar na Harbour Arena. E festival ta termina diadomingo anochi cu e grupo New Edition, cu artista conoci Bobby Brown, cu tabata den publico diasabra caba.