Na Corsou a gara mas di mil kilo di cocaina riba “go fast” y detene 3 indocumenta

 WILLEMSTAD - Efektivonan di Wardakosta a persiguí un boto go fast basta intenso ayera mainta i a logra detené. E riba e boto a haña un kargamentu di mas di mil kilo di kokaina. A papia ku Shalick Clement bosero di Wardakosta i el a konfirmá e persekushon i tambe e konfiskashon i detenshon. Ayera mainta Wardakosta su servisio di vigilansia a nota un boto nabegando basta serka di kosta di Kòrsou. Mesora a dirigí diferente unidat di warda kosta. Segun sra. Clement a bisanan a dirigí e Vutter, e Metl Shark i tambe helikòpter. I despues di un persekushon no muchu largu a logra wanta e go fast aki. Riba dje tabatin 3 hòmber ku ta 2 kolombiano i un dominikano.

Den e kompartimentunan dilanti di e go fast tabatá yená ku bultonan paresido na kokaina. A tou i bou di vigilansia estrikto i di serka a trese e boto pir di Wardakosta na Parera. Einan a bai investigá i a resultá ku tabata trata enbèrdat di kokaina. Sra. Clement a bisa EXTRA ku tabata trata di mas òf ménos mil kilo di kokaina. For di ayera mes a bai distruí e droga aki, tambe bou di vigilansia estrikto.

A nota ku tabata un go fast no masha mirá den nos awanan. Sra. Clement a konfirmá ku ta un go fast será dilanti ku diferente kompartimentu. I den e kaso aki e kompartimentunan dilanti tabatin e droga miéntras ku te patras riba e boto e tres hòmbernan tabata sintá. A pasa e hòmbernan den man di polis ku ta sigui ku e investigashonnan. NOTA: Texto ta scirbi na Papiamento fonetico di Corsou.