DVG a reinforsa nan sistema di vigilancia pa si bruela di macaco yega Aruba

ORANJESTAD - Departamento di Salud Publico a cuminsa reforsa nan sistema di vigilancia y monitor pa si posibel caso di bruela di macaco por presenta. Tambe a cuminsa organisa contacto cu organisacionan di salud local y internacional pa delinia maneho.

SINTOMA

Monkeypox ta wordo categorisa como un virus cu  ta causa sintoma leve. Pa e grupo di riesgo, cu ta mucha, hende muhe na estado of persona cu sistema inmunologico comprimi, e virus por ta peligroso te asta mortal.  

Sintomanan  ta cuminsa cu keintura, dolor di cabes, kliernan hincha y dolor di curpa. Entre 1 te cu  3 dia despues di e keintura, ta aparece un rash cu den mayoria di e casonan ta afecta cara, mannan y pianan. E rash na su turno ta transforma den blaar cu pus aden. Monkeypox por wordo confundi cu otro malesanan manera Smallpox, Bruela, of Impetigo, pa cual motibo ta importante pa un persona cu e sintomanan aki tuma contacto cu nan dokter di cas pa testnan nesesario wordo haci y asina wordo corectamente diagnostica.

CONTAGIO

Contagio cu Monkeypox den paisnan no endemico, ta sosode di hende pa hende pa medio di contacto directo (close contact) cu un persona infecta. Esaki por sosode atravez di particulanan (droplets) cu e persona infecta, ora di tosa of nister.. Tambe bo por keda infecta door di tin contacto cu e likido prosedente di e blarnan presente serca e persona infecta (skin to skin of panja contamina). 

TRATAMENTO Y VACUNA

Pa Monkeypox vacuna no ta disponibel, aunque a wordo menshona cu e vacuna contra smallpox lo tin cierto grado di eficacia p’esey prevencion ta importante. No tin tratamento disponibel, unicamente tratamento di sintoma. E ta desaparece entre 2 pa maximo 3 siman.

MEDIDANAN DI HYGIENE

Evita contacto cu hende cu ta sinti malo y laba man regularmente. Na momento cu bo a wordo diagnostica cu Monkeypox  bo lo wordo pidi pa bay den den isolasion. Pa mas informacion sigui nan riba Facebook page Directie Volksgezondheid DVG Aruba, subi nan website www.dvg.aw of yama nan na 5224200