A lansa campaña nacional pa empodera muchanan y combati abuso ‘Mi Mes Un Heroe’

ORANJESTAD – Siman pasa gobierno a lansa e campaña nacional “Mi Mes Un Heroe”, cu e meta pa empodera muchanan y combati abuso.  Covid a dal nos Pais hopi duro y lamentablemente el a empeora e situacion riba tereno di abuso sexual di menor. “Nos muchanan ta wak nos como adulto y ta spera cu nos ta stimanan, yudanan, empoderanan y protehanan. Lamentablemente ta mira cu tin biaha adultonan ta faya e muchanan y ora cu esaki tuma luga, tur adulto a faya nos muchanan. Pesey Gobierno ta continua cu esfuersonan pa combati abuso contra muchanan y ta pidi e compromiso di cada adulto pa hunto combati esaki y ofrece nos muchanan e proteccion cu nan merece,” Prome Minister Wever Croes a expresa na e lansamento.  

TRABOUNAN HACI Y CAMBIO DI STRATEGIA

Durante di e ultimo añanan, Gobierno di Aruba a traha riba diferente aspecto pa combati e tipo di abusonan aki. Entre otro: a aumenta e castigo maximo na 2020, a traha riba e reglanan cu un delito asina no ta caduca mes liher cu antes, a traha tambe riba un ‘central meldpunt’, codigo di proteccion y tin mas cambio cu ta trahando riba dje. 

Sinembargo ora cu mira tur locual cu a haci y ainda ta mira cuanto caso ta tuma luga, a realisa cu mester cambia e strategia. E strategia cu lo introduci aworaki ta, pa empodera muchanan mes, pa nan tambe por yuda proteha nan mes. Pa nan sa ki ora pa bisa no y busca un hende di confiansa pa bisa kico ta pasando, pa por protehanan mas na tempo, Prome Minister a splica. “Lamentablemente gran cantidad di e casonan di abuso sexual di menor cu ta tuma luga, ta door di un abusador cu ta cerca di e famia. Sea ta un familiar, omo, ruman, abuelo, abuela, tanta, primo, prima of amistad di mayornan.”