Hunta di supervision HOH: A tuma debido medida contra director financiero

ORANJESTAD - Hunta di Supervision di Horacio Oduber Hospital (HOH) ta sigura cu nan a tuma debido medida contra e director financiero Gregory Croeze, den e incidente cu a tuma lugar cune recientemente. Asina un comunicado di e hunta di supervision ta sigura diamars atardi. Pero, den e comunicado no ta bisa si ki medida a tuma contra a director. Di otro banda , cu esaki tambe, nan ta kibra nan silencio riba e caso cu a sosode mas cu dos siman pasa, unda cu e director a keda deteni debi cu e tabata bou di influencia di alcohol segun polis. E hecho cu no a tende nada, a crea hopi reaccion, incluyendo den e portal aki. 

REACCION

Despues di esaki, diamars atardi, e reaccion a bin porfin. E hunta ta cuminsa na bisa cu nan a tuma nota di discusionnan andando den medionan di comunicacion encuanto e incidente, na unda ta haci e reproche cu no lo a tuma ningun medida. “Hunta di Supervision di HOH pa medio di e reaccion aki kier duna di conoce cu esaki no ta cuadra cu berdad y cu si a tuma medida contra sr. Croeze”, e comunicado ta cuminsa na bisa.  

PROPORCION Y HURISPRUDENCIA

Segun e hunta, na momento cu tuma medida esaki mester wordo haci conforme hurisprudencia cu ta semper den proporcion cu e incidente. Hunta di Supervision ta sigura cu nan a tuma sumamente na serio e incidente cu ta implica sr. Croeze y a haci su debido investigacion kico tabata e situacion exacto pa asina tuma medida apropia. Y mester duna di conoce cu e medidanan cu a tuma ta den proporcion cu e situacion di e caso.  

COMPARACION

“E comparacion cu ta wordo haci den medionan di comunicacion cu dos otro caso di perfil halto cu a tuma luga recientemente no ta di compara mirando cu e situacionnan y e gravedad di e casonan ta completamente diferente y pues tambe e medidanan cu mester wordo tuma” e comunicado ta sigui bisa. “Pero nos como Hunta di Supervision kier enfatisa si cu nos ta desaproba completamente e incidente cu sr. Croeze tabata aden. Sr. Croeze na tur momento a duna su cooperacion completo y alabes a pidi su disculpa publicamente. Hunta di Supervision tin pleno confiansa cu e medidanan cu a tuma ta exclui ripiticion di e mesun comportacion di e persona en cuestion”. 

CONFIANSA

Hunta di Supervision finalisa bisando cu nan ta spera cu comunidad tin e confiansa cu e medidanan tuma ta apropia y bon evalua. Hunta di Supervision continuamente lo keda haci todo por todo dentro di e organisacion den cuadro di concentisacion di tur peliger cu por presenta na momento cu core bou influencia.