Caso di detencion di director financiero di HOH pa core bou influencia, a bay den doofpot?

ORANJESTAD – Dos siman despues cu polis a detene e director financiero di hospital Horacio Oduber pa a core bou di influencia, e director ta bek na trabou y e caso ainda no a wordo trata internamente na e nivel necesario. Mientras cu segun e portal aki a confirma, riba nivel gerencial si e tema a keda trata, y cu e director a keda cas algun dia. Y diasabra siman pasa e director financiero a publica riba su pagina di Facebook, loke mester ta un ‘disculpa publico’ y awor ta bek na trabou. Esaki ta creando discusionan rond pa loke ta e forma con ta maneha tipo di actonan asina y si ta midi cu dos midi. Y tin suficiente ehempel pa trece dilanti cu ta confirma esaki. 

CASONAN ANTERIOR

Algun tempo prome, a dispidi un poort arts caba (dokter na Eerste Hulp), pa e mesun motibo. Tambe recientemente e director di un instituto financiero a tuma su retiro despues di a keda deteni pa core bou di influencia y causa un accidente. Y mas prome, ex vice presidente di Algemene Reken Kamer tambe a keda deteni pa ta bou di influencia y a tuma honor na su mes y a retira. Tur ta(bata) personanan cu funcion ehemplar, y cu cual accion tin mas peso, cu un persona ‘regular’. Tambe den un caso manera esaki. 

REACCION

A tuma contacto cu minister di salud Dangui Oduber pa su reaccion riba e tema, pero e no a reacciona ainda, y mescos ta conta pa e director di HOH mes, cu algun siman prome mes a retira e poort arts pa e mesun motibo. Oficialmente tin un silencio   hermetico riba e tema, y ta mustra cu e asunto aki ta wordo cataloga como un incidente ‘no serio’ y cu un disculpa publico riba facebook, e ta ok pa sigui traha y cu e ta wordo poni den un ‘doofpot’. 

ADMISION 

Den e post riba Facebook di diasabra ultimo, e director financiero ta confirma e incidente, unda cu manera e mes ta splica, despues di ‘a bebe tres cerbes’ e la wordo para pa polis durante un control rutinario y no a pasa e test di supla. Despues di su detencion, e la wordo hiba warda di polis unda cu ,- segun e mes ta conta -, despues di un otro supla mas, enberdad segun e regla, ta keda confirma e ta bou di influencia. E director ta sigui splica riba su pagina cu ta trata di ‘algo menos cu un cerbez mas’ cu e lo a bebe cu a pone supla asina. “Esaki no ta e ehempel cu mi kier duna”, e director ta sigui bisa. Despues e ta sigui pidi su famia, coleganan di trabou y comunidad ‘un disculpa’. “Tambe mi kier sigura un y tur cu e eror di huicio aki lo no bolbe ripiti”, e director financiero ta termina su post. 

MIDI CU DOS MIDI

E comentarionan cu ta circula, ta papia di midi cu dos midi, depende e persona y aunke cu ta trata di un persona cu funcion ‘ehemplar’. Ademas tin un otro angulo cu ta wordo discuti, cu ta mustra cu dependiendo di e funcion y e nivel di trabou y compania, ta keda na cada compania ki decision nan ta tuma. Loke pa un compania ta un fayo garafal, pa un otro, dependiendo e nivel, e persona en cuestion por ‘get away’ cu un simple ‘warning’. “Bo no por compara un director di hospital cu un director di un instituto publico, y uno di un compania priva manera ‘accounting’”. Esey ta e pensamento y cu pesey, den e caso aki por ehempel, a trata esaki diferente. 

TEMA POLITICO

Di otro banda, tin e pensamento cu pasobra e persona aki ta apunta politicamente pa varios otro funcion den diferente nv di gobierno, cu esaki ta pone cu e ta haya ‘cierto proteccion’ politico y cu no por ‘mishi’ cu ne y cu pesey e asunto ta asina hermeticamente cera sin cu ta tumando accion cune, mientras cu si ta otro hende, esaki lo a keda atendi di un forma completamente diferente.

HUNTA DI SUPERVISION

Tambe hopi ta cuestiona e rol di e hunta di supervision, unda cu e portal aki (manera indica caba), no a atende cu e tema aki ainda, pa straño cu por zona. Un Hunta cu ters consisti di 5 persona, pero cu ta ‘operando’ cu apenas 3 persona, di cual dos ta liga cu gobierno, incluyendo e presidente di e hunta. Un abogado, un accountant y un ginecoloco, cu ta e presidente di e hunta. Tempo lo mustra kico ta kico relaciona cu e tema aki