Fiscal ta admiti cu OM no a haci un bon trabou inicial den caso asesinato Poentje Castro

ORANJESTAD – “Tin cierto cosnan cu no a bay manera debe ser” tabata declaracion di fiscal mr Patrick vd Biezen diabierna atardi despues di e tratamento di e caso Apollo, cu ta trata e asesinato di e personalidad Poentje Castro. Cu e declaracion aki, vd Biezen ta admiti cu Ministerio Publico no a haci un bon trabou inicialmente ora cu e caso mes a tuma lugar. E ta referi specificamente na e parti investigativo cu e la yama “no optimal”. “Lamentablemente nos tin cu bisa esey” vd Biezen a continua bisando, declarando na prensa pafo di e edificio di Corte. 

HACIE MAS BUNITA

E fiscal a sigura cu e no tey pa haci e cos mas bunita cu e ta. ”Absolutamente cu no!”. E trabou como guia den e investigacion, tampoco a bay bon. “E por tabata mas miho” e fiscal a sigui bisa, di e tempo ey tambe. E ta bisa cu awor ta facil pa bisa cu 11 aña pasa cos por a bay mas miho. “Pero esey no ta kita cu nos a haci un review na 2019 unda cu e team a bin hunto cu wowonan fresco, a tuma e onderzoek di nobo. A cuminsa cune tambe y pa asina awe por a presenta un caso cu nos ta haya, cu tin suficiente prueba pe”, e fiscal a continua bisando.

DOCUMENTONAN PERDI

Entre e problemanan encontra, e fiscal ta papia di documentonan original cu no tey mas y cu no por a usa mas, cu por tin un influencia riba e decision di hues. Esaki pasobra segun regla y ley, hues mester haya cierto documentonan original di un caso. Pero den e caso aki, no por a haya varios di nan, y a manda copia pa e hues. Esaki pues por tin influencia riba e caso y ta depende con hues mira e caso y dicidi ariba, segun e fiscal. 

PRUEBA

Asina mes, segun e fiscal, tin suficiente material cu ta pone e sospechoso Rasmijn na e sitio, y cu ta convincente pa condena e persona aki. E ta referi na un grabacion specifico entre e sospechoso principal y un co sospechoso. A base di esey, fiscal ta haya cu mester por sentencia e persona. 

CRITICAE fiscal a critica si e parti di e abogado con e lo a acusa OM, fiscal cu lo a traha un deal cu e co-sospechoso Gonzalez, y cu esey no ta berdad. E fiscal ta considera e acusacion aki como uno serio y sigur si no tin prueba pa substancia e prueba aki. Como tal e fiscal vd Biezen a desmenti sigur cu tin un deal traha.