Diaranson reunion di IPKO ta inicia cu tema principal COHO

PHILLIPSBURG – Diaranson e siguiente reunion interparlamentario di Reino Hulandes IPKO ta inicia, na St Maarten e biaha aki. Tema principal lo ta e ley di COHO y tambe RAFT, pero mas importante esun di COHO. Ta durante di e reunionan aki, lo conoce oficialmente e punto di bista formal di e tres islanan riba e tema, y con lo anda cu Hulanda riba e tema. Manera ta conoci Corsou y St Maarten a mustra cu nan kier pa renegosha COHO completo atrobe, y Aruba tambe ta mustra den e direccion ey. Echo ta cu e tres islanan Aruba, Corsou y St Maarten a pidi Hulanda mas tempo pa por entrega pregunta riba e ley, pero Hulanda no a condeci e tempo solicita. Hulanda a bay di acuerdo si pa cambia e fecha di 20 di April pa 18 di mei di e aña aki. E islanan a pidi pa e fecha di 17 di juni di e aña aki pero Hulanda no a aproba esey. Despues di e reunionan di IPKO, e gobiernonan di respectivo islanan lo trata e resultado cu secretario di estado Hulandes van Huffelen cu lo ta aki banda fin di mei proximo. E potret ta di e ultimo reunion IPKO cu a tuma lugar na Bonaire na augustus di aña pasa.