WILLEMSTAD - Den e fin di siman ku ta drenta aki komunidat, i partikularmente esnan ku ta biaha lo por haña nan mes konfrontá ku un situashon fèrfelu, esei pa motibu ku nan ta kore e riesgo ku nan ekipahenan lo no ser atendé. Tin chèns ku empleadonan di “ground handling”, den e kaso aki dje kompania Swissport Cargo, lo bai den akshon. Esei EXTRA por a komprondé for di un kòmbersashon ku e presidente di UGTK/Cadmu, sr. Wendell Muelen. Segun sr. Muelen, e situashon lo por bira unu ferfelu bèrdat pa motibu ku ta e grupo aki ta atendé ku maleta i algun otro servisio di karga, kual lo por keda paralisá, ku tur e konsekuensianan ku esei por trese kuné.
Segun sr. Muelen, tin algun tempu kaba, for di yanüari por sierto, ku e sindikato ta negoshando un kontrato kolektivo pa su miembronan di Swissport, pero gerensia di e kompania no ke kita for di nan posishon. Un dje puntonan prinsipal ku ta negoshando ta salarionan. Tin un kantidat grandi for di e grupo di 70 empleado ku tin basta aña trahando, ku un entrada ku no ta surpasá fl. 1.700.- pa luna, pues e salarionan ta hopi abou i e ta kere ku lo por duna algu mas. Ta solamente trahadónan ku tin hopi aña di servisio tin salarionan ku ta surpasá dos mil florin pa luna.
Tin pago abou, siendo ku e trahadónan mester ta disponibel for di 5or di mainta te 10or djanochi pa atendé ku kargo di avionnan ku yega. Nan ta traha asina duru ku nan boka di traha a bira nan kas, pasobra nan ta pasa mas aki ku na nan kas mes. Aworakí partidonan ta na mesa ketu bai i no por sali afó. Sindikato a pidi 7% di oumento, i asta a mustra disponibilidat pa baha na 6%. Pero gerensia ta para riba 3% i no ke kita for di e posishon ei. Nan ke un oumento konforme subida di kosto di bida, pero e realidat ta ku finalmente e salarionan ei ta hopi abou. Si bai duna un oumento di akuerdo ku nan proposishon, e trahadó lo bai kas ku un oumento di apénas fl. 50.-, i na momentu ku kita belasting for di dje e lo keda para mes kaminda òf te asta bai atras.
Segun sr. Muelen, komo sifuera no ta basta esnan den tòp di gerensia ta bai fo’i Kòrsou, poniendo ku tin di negoshá ku hende na distansia te na Trinidad. Pero nan ta para riba nan punto pa motibu ku ni airopuerto ni haf ta kai bou di Areglonan Laboral. Nan lo por tin un rason pero komo sindikato e ta konsiderá ku partidonan ta den un negosiashon, i e lo keda para riba e punto di oumento salarial. NOTA: Texto ta scirbi den Papiamento fonetico di Corsou.
WILLEMSTAD - Minister di enseñansa sr. Sithree van Heydoonr a manda karta pa parlamento kaminda e ta pidi un reunion di komishon sentral pa por deliberá riba periodo di kalor na skol.
WILLEMSTAD - Ultimo añanan tras di lomba a traha duru riba kòntraktnan nobo pa e unidatnan aéreo pa Wardakosta Karibe Hulandes. Meta di a sera e kòntraktnan aki ta un provedor di servisio konfiabel pa Wardakosta i unidatnan aéreo moderno, ekipá ku hèrmèntnan teknológiko ku ta yuda den ehekushon di e tareanan di Wardakosta.
WILLEMSTAD - Apesar ku asuntu di refugiado ta keda un responsabilidat outónomo di kada pais den Reino, gobièrnu Hulandes ta dispuesto pa yuda Kòrsou, Aruba i St. Maarten ku ayudo tékniko den kaso ku pidi pa esaki. Gobièrnu Hulandes ta enfatisá sinembargo ku ta importante ku ta habri diálogo ku organisashonnan no gubernamental pa optimalisá kolaborashon.
WILLEMSTAD - Diesocho instituto di enseñansa i konosementu di e parti karibense di Reino i Hulanda ta bai sigui strukturá i intensivá nan koperashon riba tereno di enseñansa, investigashon i siensia. Asina por ehèmpel nan kier bai desaroyá entre otro programanan di enseñansa konhuntamente. E kolaborashon speshal ta resultado di e mishon di konosementu den e área karibense bou di liderazgo di minister Dijkgraaf (Enseñansa, Kultura i Siensia). Djabièrnè último a klousurá esei na Kòrsou.
WILLEMSTAD - E frakshon di MFK ta hopi preokupá ku kasnan ku no tin suministro ainda di awa. P’esei nan ke un reunion públiko, kaminda ta invitá minister Ruthmilda Larmonie-Cecilia i su kolega minister Ruisandro Cijnte pa ta den sala di parlamento i asina debatí ku nan riba e tópiko aki.
WILLEMSTAD. – E akusado V.V. (33) nasé na Aruba su kaso a keda tratá den su ousensia. Segun akusashon dia 21 di febrüari último, el a trata na eksportá 1.535 gram di mariwana.