Simar riba veredicto pa recorte salarial: Lo no sinta man cruza!

ORANJESTAD – Mientras cu hues a prohibi sindicato SIMAR di bay den accion pa protesta contra e recorte salarial di 12.6%, e no a mara su man completamente manera cu gobierno tabata kier. Asina presidente di e sindicato, Josephine Albertus a bisa diahuebs durante un conferencia di prensa. “Nos no ta sinta man cruza, y nos por pone presion (riba gobierno)” Albertus a bisa. Ademas e la sigura cu ‘tin caminda pa cana, y cu ‘e lucha ta sigui’. Asina Albertus a reacciona riba e veredicto cu nan a ricibi ayera di hues, como resultado di e caso sumario cu gobierno di Aruba a entama contra nan (y sindicato SEPPA), pa evita paro den enseñansa. 

VEREDICTO

Manera cu e portal aki a raporta un dia anterior caba, hues a enberdad prohibi e sindicato (nan) pa welga contra e recorte salarial pa pone presion riba gobierno, y tambe di traha menos ora como ‘recompensa’ pa e recorte salarial. Di otro banda, hues a limita e accion na e motibonan menciona, contrario na loke cu gobierno a pidi, esta un prohibicion total di welga. Esey hues a haya mucho amplio y a limita esey. Tampoco a impone un multa pa e sindicato(nan), pa incumplimento pasobra hues no ta kere cu sindicatonan lo bay desobede. Potret di noticiacla ta di archivo.