Vroegop: Hospital Horacio Oduber ta pro pa un fusion cu IMSAN

ORANJESTAD – Hospital Horacio Oduber ta pro pa un fusion cu IMSAN. Asina director di e hospital, Jacco Vroegop a sigura noticiacla diahuebs. Esaki pa kita tur duda cu tin e dianan aki, sigur den e arena politico. Cu e declaracion di e director, e ta sigui e declaracionan politico anterior riba e tema, e deseo di AZV y VWS. Cu esaki, e ta sostene e famoso Rapport Hubben/Batenburg, unda cu claramente te argumenta cu un fusion ta esencial den mantene cuido pagabel y acesible riba e isla. Asina e director ta sigui bisa. 

GASTONAN AUMENTA

Segun e director ta sigui bisa Noticiacla, sin un fusion e gastonan ta aumenta y e costonan actual no por wordo reduci. “Esey en realidad ta nifica cu tin menos placa disponible pa cuido y cu si no tin fusion, por duna menos envez di mas cuido”. Esey, segun e director, lo ta un lamento pa Aruba y e comunidad, mirando cu e placa bo por saca solamente un biaha, y nos ta biba caba den un bida hopi desafiante cu e aumento di inflacion y e landenpakket. “Cu un fusion, ta mas cuido por wordo presta den e otro parti di e isla. Y esey kier men cu hendenan eynan diripiente por bishita un ginecologo of urologo, pero tambe por haya tratamento di cancer mas cerca di cas. Door di comparti informacion, e ta crea cuido mas lihe, sigur y miho. 

FUSION

Hospital, segun e director, ta lamenta extremadamente, cu ta usa tur sorto di argumento contra un fusion, envez di soma tur e beneficionan. “Claro cu hopi biaha tin miedo pa lo desconocido, pero esey no kier men cu bo mester bay cambia sino tuma reto y posibilidadnan. E fusion ta den interes di tur hende na Aruba. Cu ta bringa asina fuerte contra, ta demonstra solamente cu tur hende den profundidad di nan curazon, sa esey tambe, esta cu un fusion ta miho” e director ta sigui bisa. “Pesey nos ta wak positivo pa e fu turo y tin tur confiansa cu tur cos lo ta bon, y cu e ciudadanonan di Aruba finalmente lo haya e miho pa nan salud y nan placa” e director a finalisa bisando.