CAft ta contesta Aruba otro siman riba posibel rebaho di productonan petrolero

ORANJESTAD – Otro siman e colegio di supervision financiero di Aruba CAft, ta contesta gobierno, riba e peticion pa implementa reduccion di prijs pa productonan petrolero. Por lo menos esey ta e intencion, segun e colegio a confirma na noticiacla diahuebs mainta. “ CAft ta trahando riba e contestacion di e carta di Aruba” e colegio a cuminsa bisa, refiriendo na e carta cu e la ricibi dialuna atardi riba e tema. “E intencion ta pa den curso di otro siman, tin un contesta cla (pa gobierno di Aruba), e colegio ta finalisa bisando. Unabez cu e contesta ta cla, por deduci si CAft ta bay di acuerdo cu e plan di gobierno pa reduci gasto pa prijs di productonan petrolero, manera gasoline y kerozine, baha. No ta conoci ki forma lo keda aproba, of si tin un conseho mes aproba pa baha e prijs. Pasobra por bien ta cu CAft ta para ariba cu no por baha nada, pasobra e ta afecta e entrada di gobierno. 

GEOFFREY WEVER

Tabata e siman aki (diamars) cu minister encarga cu economia y e prijs di e productonan petrolero, Geoffrey Wever, a informa publicamente cu a opta pa no mishi cu e medidanan posibel pa reduci prijs di e productonan sin consulta cu e colegio prome. Esaki pasobra aña pasa caba nan (gobierno) a sinti e efecto di nan decision unilateral pa baha e tasa di loonbelasting. E decision ey no a cay den bon tera di e colegio y nan a informa gobierno cu debi na e acto ey, gobierno ta perde 8 miyon y a urgi gobierno pa revoca e decision ey. No ta conoci si esey a sosode. E decision ey tambe a conduci cu gobierno no a haya mas sosten di likides, ‘pasobra gobierno a perde pa haya 8 miyon’ aña pasa.