Gobierno di Corsou lo duna tur cooperacion na doño nobo di Campo Alegre

WILLEMSTAD - Pronto e edifisio di Campo Alegre ta bai findishi. Gobièrnu a keda mantené su intenshon ku e sentro di prostitushon na momentu di ser bende na findishi, mester keda un sentro di prostitushon. P’esei gobièrnu lo duna tur koperashon na e doño nobo di e sentro di prostitushon, pero basta habri esaki komo tal. Minister di hustisia sr. Shalten Hato ta konfirmá pa EXTRA ku enbèrdat, a keda disidí ku gobièrnu ta duna tur su koperashon p’e sentro keda den tal funshon manera e tabata promé ku el a sera na 2020, na momentu ku covid-19 a dal aden.

E findishi ta kai bou di ministerio públiko, i ya a kontratá notaris Steenbaar pa atendé e findishi. Ainda no tin fecha ki dia e sentro lo bai na benta públiko, pero si ta spera ku ta pronto.

Mas aleu sr. Hato a sigui bisa ku e gobièrnu aki ta para pa habri e sentro p’asina evitá prostitushon riba kaya i malesa. Ta kita e “free for all” ku tin ta tuma lugá awor ku e sentro ta sera.

Ademas tin hende spesial ku mester di un tipo di sentro asina. Ademas ku añanan Campo a bira atrakshon turístiko tambe.

Minister Shalten a sigui bisa ku banda di esaki e ta trahando riba un maneho di prostitushon pa evitá trafikashon di hende i òf hasi mal uso di hende, maltrato ora e sentro habri. P’e asuntu di maneho ya kaba tin un grupo di trabou ku a keda instituí i ta trahando aktualmente. E loke ku haña ku e findishi ta bai fondo di kriminalidat, segun e mandatario na EXTRA.

No ta awor ta papia di bende e sentro di prostitushon na findishi. Esaki a surgi for di despues di e sentensia den korte di apelashon di dia 20 novèmber 2008 kontra di e kompania Wilshire Advisors Ltd. ku ta establesé na Tortola (British Virgin Islands). E kompania aki a keda kondena na un suma di Ang 14.219.948 florin pa pago den un kaso di ekspropiá. Pasombra e kompania Wilshire ta ser konsiderá di a ser usá pa laba plaka di droga, i tambe di ta forma parti di un organisashon kriminal. Campo Alegre ta kai bou di e kompania aki.

E suma di 14 mion ta konsistí di un suma di 4.247.948 ku e doño di Wilshire a haña ku labamentu di plaka via di konstrukshon di Orel Group, Wellborough Corp na Florida. Tambe ora mira e balor di merkado dje kompleho ta 11 mion, a kumpra e terenonan pa 1.028.400 i pues a saka probecho di 9.971.600. E suma di 9 mion mas esun di 4 mion ta yega na 14.2 mion florin ku Wilshire mester paga.

Si gobièrnu ke pa e sentro keda bende komo tal, esta pe ta un sentro di prostitushon, kasi sigur esaki lo mester ta un dje kondishonnan ku lo ta pone den e teksto di findishi, si no e deseo di gobièrnu lo no por keda kumplí. NOTA: Articulo ta scirbi den Papiamento fonetico di Corsou.