Minister ta sigura cu ‘schoolgeld pa scolnan di SKOA no ta aumenta’

ORANJESTAD – School geld lo no aumenta pa scolnan di SKOA, y werksternan di SKOA lo no perde trabou. Por lo menos, asina minister di enseñansa Endy Croes a sigura den un comunicado diamars atardi. E mandatario ta bisa adicionalmente, cu e ta ‘duna di su banda cu Gobierno lo pone extra placa pa 2022 unda ta garantisa cu e werksternan lo keda cu nan trabou y garantisa cu schoolgeld no lo aumenta’. E mandatario no a bisa si, di cuanto placa ta papiando aki ni di unda e ta saca esaki pa wordo paga. Por compronde cu e placa ta bin awor di e presupuesto aproba pa 2022. Directora di SKOA mientrastanto,  Anuesca Baly no a confirma e informacion aki pa noticiacla. 

REUNION

E minister di enseñansa ta bisa cu dialuna ultimo reunion a continua unda hunto cu Register Accountant Anthony Croes di Plus Accountants y consehero di Ministerio di Enseñansa, a reuni cu presidente di hunta di supervision, staf financiero y directiva di SKOA. “E deseo di ambos partido ta pa yega na un solucion structural pe problematica di werksternan cu tin hopi aña andando” e mandatario ta sigui bisa. Minister Endy Croes a sigui bisa cu e reunion a bay den un esfera ameno unda tin comprension pa otro y a discuti den profundidad dos trayecto cu lo cana: 1. E punto di salida ta pa ningun werkster no perde trabou y tampoco no lo aumenta schoolgeld. 2. E otro trayecto ta pa expertonan di cifra keda na mesa pa por soluciona esaki structuralmente. “Minister Endy Croes a duna di su banda cu Gobierno lo pone extra placa pa 2022 unda ta garantisa cu e werksternan lo keda cu nan trabou y garantisa cu schoolgeld no lo aumenta” e mandatario ta finalisa bisando y cu ta riba e bon caminda, tin entendimento y poco poco ta yegando mas cerca di otro.