Tjon: Alto comisario nobo ta bin Aruba como parti di ‘rechtshulp’ di Hulanda

ORANJESTAD – E Alto Comisario nobo pa Aruba no ta bay gana mas cu uno local. De hecho, e ta costa Aruba practicamente nada. Asina minister di husticia di aruba Rocco Tjon a sigura noticiacla recientemente durante e programa Noticiacla LIVE. E mandatario a bisa cu ora cu a dicidi cu e persona menciona recientemente, Ramon Arnhem a keda selecciona, a haci un peticion pa asina yama ‘asistencia tecnico’, bou di cual e tambe ta cay, cu ta haci cu no tin cu costa Aruba mas placa pa atrae un persona di afo pa haci e trabou aki. Ora cu Hulanda manda personal, e ta cubri hopi di e gastonan aki como asistencia, envez di duna Aruba placa bruto pa asistencia. Nan ta manda e personal aki pa Aruba pa asina e por brinda e asistencia tecnico cu nan ta bin cu ne, y asina fortifica e departamento, den e caso aki, e cuerpo policial local. E mandatario a sigura cu asina e gastonan ta keda abou. E no a bisa si cuanto e persona aki lo cobra finalmente. Ademas e persona ta keda cu su posicion huridico di Hulanda, mirando cu ta pa solamente 3 aña e ta bin Aruba, pa despues e bolbe Hulanda den su funcion regular. 

CINCO ALTO COMISARIO

E mandatario a sigura tambe cu no ta asina cu nos tin 5 alto comisario, manera cu kier pretende eyfo. Pero riba e pregunta di e portal aki, cu loke cu hopi kier men ta cu e persona no ta den funcion mas como Alto Comisario, pero ta retene su salario si di Alto Comisario, e mandatario a sigura cu no ta asina. Por lo menos, no si e persona no ta eherce un funcion cu tin un responsabilidad casi igual na loke e tabatin. Loke sigur e no ta bay tin mas, ta e asina yama ‘toelagenan’ cu ta pertenece na un Alto Comisario. Actualmente tin 4 persona cu ta ‘gozando’ di e salario, pero cu a confirma segun e mandatario, cu nan ta eherciendo funcionan ekivalente na e nivel di un Alto Comisario, pues e ta hustifica e suma cu nan ta ricibiendo aworaki. Pero sigur, no por sigui bisa cu nan ta Alto Comisario, pasobra nan no ta den e funcion aki mas.