Awor cu fondo aloca, porfin por bringa problematica di cacho riba caya

ORANJESTAD – E problema di cacho riba caya, ta bay haya atencion proximamente. Por lo menos asina e mandatario responsabel pa e asunto, Ursel Arends a priminti e siman aki den un conferencia di prensa. E mandatario a presenta e asina yama National Plan for Stray Animals (NPSA), como forma pa atende cu e problematica di cacho riba caya. E plan no ta nobo, pero awor e diferencia ta cu a aloca fondo, pa asina por cuminsa atende cu e asunto aki di un forma mas structural. 

DIVISION

Actualmente tin un division entre varios grupo cu ta atende cu problema di cacho y pushi di caya, y esaki ta debi na e vision con pa mihor resolve e problema. E problema ta e aspecto di gara e cacho y of pushi y kico pa haci cu ne despues. Y esaki ta choca cu e ley di cacho existente y aki ta unda cu mester logra yega na un acuerdo. E mandatario a papia tambe di e grupo grandi cu tambe ta vocifera nan preocupacion y derechonan, cual ta e grupo cu ta sinti molester di animalnan riba caya. Entre otro tin e peaton, ciclistanan y e sector di horeca y hotelero.

CAMPAÑA

Durante e conferencia di prensa tambe a lansa un campaña di Gobierno di Aruba den colaboracion cu Post Aruba N.V. pa asina stimula doñonan riba nan responsabilidad pa mantene nan mascota den cura den un forma conforme e ley. Esaki ta encera cu lo ubica mensahe na casnan y otro establecimento unda cu ta nota situacionan no corecto pa loke ta maneho di mascota.