VWI: WeverCroes norm lo haci dificil pa atrae talent top pa funcionan top

ORANJESTAD - No solamente e posicionnan di CEO den companianan estatal Arubano a bira posicionnan politico, pero tambe awo, cu e introduccion di e Landsverordening Normering Topinkomens (LNT, e ley pa regula salario di top ehecutivonan den companianan semi gubernamental) , lo bira posicionnan barata den cual lo ta dificil pa han?a talentonan top pa aplica. Den tempo, lo barata ta sali (pueblo) caro! Asina e Asociacion di personal di Staf di WEB Aruba NV, miho conoci como VWI, ta reacciona e siman aki.   

Segun e grupo, nan a lesa y studia e ley y a keda asombra, pa no bisa babuca, di e contenido proponi den e OLV-LNT aki. Segun nan, E OLV-LNT ta miho conoci den boca di pueblo manera e “Evelyn-Wever-Croes-Norm” (EWC- Norm), cual segun nan, Gabinete Wever-Croes a hiba pa Hulanda riba schaalchi di plata pa Hulanda inclui esaki como condicion pa Aruba han?a sosten di likides fia (mescos cu GdA a haci pa cu e 12.6% recorte den salario). “Asina’ki porfin Gobierno di Aruba (GdA) por a han?a un pretexto pa por corta den e salarionan di directornan y ehecutivonan di e companianan estatal Arubano y pone un “maximum” den esaki” nan ta sigui bisa den e comunicado di prensa. E pregunta principal segun e grupo, ta ta: kico ta e balor agrega di e “maximo” aki di e salario di directornan y ehecutivonan di e empresanan estatal? “GdA kier “spaar placa” cu esaki? GdA kier por cobra mas dividendo for di caha di e compania estatalnan door di implementa e LNT?” nan ta sigui puntra.  

Segun e grupo, e interesante ta cu den e LNT ta poni un maximo di 261.000,- florin maximo (Articulo 9 di e LNT) pa an?a pa ehecutivonan di empresanan estatal pero e LNT no ta aplicable pa “politieke ambtsdragers” (cf. Artikel 3 lid a). Segun e Memorie van Toelichting e salario di e politieke ambtsdragers (por ehemplo, nos Minister President) ta regula pa e “Landsverordening voorziening politieke ambtsdragers”, y p’esey e salario di Parlamentarionan y Ministronan ta regla pa ley caba.  Esaki ta corecto. Sinembargo VWI ta di opinion cu GdA ta comete un eror fundamental di pensamento den su argumentonan treci dilanti den e Memorie van Toelichting pa e implementacion di e LNT. “ Ta berdad cu GdA, como unico accionista, of accionista mayoritario, di e empresanan estatal, ta den su derecho pa stipula salario di e ehecutivonan y comisarionan cu ta maneha un empresa estatal” nan ta sigui bisa. Ta berdad tambe cu e maximo di 261.000,- florin pa an?a imponi pa e LNT ta parse gran cos y ta mas halto cu e salario di un Prome Ministro. “ Pero echo ta cu e posicion di Prome Ministro, Ministro of Parlamentario ta keda netamente un posicion politico. E posicion di un director di un compania estatal, teoreticamente, no ta supose di ta un posicion politico, pero un posicion netamente profesional”. Dus, e grupo ta sigui bisa, crioyamente bisa, maneho di un compania estatal manera WEB, ELMAR, SETAR, etcetera ta rekiri di un profesional y no di un politico. 

NIVEL INTERNACIONAL

Nan ta sigui splica cu den e mercado laboral profesional internacional na nivel di CEO, un jaarsalaris di 261.000,- florin pa an?a no ta gran cos di canta macamba. Salario di un top profesional den mercado ta algo sumamente competitivo. E compania cu ta paga miho ta han?a por en general e miho ehecutivonan traha p’e. E top profesionalnan cu por han?a trabou di top salario pafo di Aruba no lo tin un incentiva pa bini Aruba y lidera un empresa estatal a base di e maximo poni den e LNT. “Mas ainda, si e maximo den salario aki ta “trickle down” den e posicionnan clave di staf den e empresa estatal, dus, menos salario lo ser ofreci pa posicionnan clave di staf, e atraccion financiero pa un profesional hoben yiu di tera bini bek Aruba traha ta bira (hopi) menos”, e grupo ta sigui bisa.