AHATA kier clarididad di minister cu realmente a kita paro pa prome permiso laboral

ORANJESTAD – E asosacion turistico Aruba Hotel & Tourism Association (AHATA) kier un garantia y/of confirmacion di minister di Labor Glenbert Croes, cu enberdad su maneho riba ‘prome permiso’ a cambia. Esaki e CEO di e asosacion Tisa LaSorte ta pidi e mandatario den un carta cu noticiacla tin den su poder. E confusion ta segun LaSorte, cu no tur hende ta ‘riba e mesun liña’, riba e tema aki. E CEO ta mustra e mandatario riba su reunion recien cu DPL, cu ta e instancia pa maneha asunto di trabou, cu nan a informe cu nan no a haya instruccion di e minister riba su cambio di maneho. 

REUNION CU MINISTER

LaSorte ta splica e minister den e carta cu durante un reunion cu su persona y tambe na e asamblea di e asosacion, e mandatario a confirma e hecho cu e la cambia su maneho di prome permiso, particularmente eliminando e paro riba prome permiso, cu a keda implementa durante e pandemia, den jntento pa salvaguardia e trabou di nos hendenan local. Pero awor cu e pandemia ta practicamente tras di lomba y cu tin necesidad urgente pa trahado den e sector aki, a opta pa kita e paro aki. 

DPL

Sinembargo, ora cu LaSorte a reuni cu DPL, nan a informa e CEO sorpresivamente cu nan no ta na altura di e cambio y cu nan no a haya ningun instruccion cu ta diferente di e paro instrui ora cu e pandemia a cuminsa.