Hues a prohibi abogadonan haya documentonan cu Sevinger duna landsrecherche

ORANJESTAD – Manera programa, awe mainta un hues imparcial mester a dicidi riba e lista di peticionnan di abogadonan den e caso penal Avestruz, cu tin como sospechoso principal ex minister Benny Sevinger. Hues den e caso aki, a opta pa ‘honra’ e punto di bista di e fiscal di Ministerio Publico. Cu esaki, e ta rechasa peticion di abogadonan den e caso pa haya documentacion cu e sospechoso Sevinger a entrega na Landsrecherche, durante su interogacion. E informacion lo ta trata cosnan cu e actual gabinete ta practica den maneho di tereno.  

HUES COMISARIO

Un otro victoria pa fiscal, tabata cu hues a honra aki tambe e peticion pa manda e caso pa un hues comisario pa scucha e testigonan cu a keda aproba pa wordo scucha. Aki ta trata tambe hasta testigonan cu abogado tabata kier a scucha den corte. Tambe a aproba tur esnan cu fiscal a aproba como testigo. E loke cu fiscal no ta haya relevante, no ta wordo scucha. 

CONTACTO

Un victoria pa e abogadonan ta cu hues a aproba cu e lo kita e prohibicion di contacto cu e sospechosonan tin ainda. Esey kier men cu e sospechosonan por tin contacto atrobe cu cierto persona cu anteriormente no tabata posibel. 

FECHA FINALHues no a pone un fecha final pa tratamento di e caso mes, pero a dicidi pa stipula e fecha di 14 di juni proximo (2022) pa 11’or di mainta pa haya un actualisacion di e interogacionan y asina dicidi kico lo pasa finalmente cu e caso y si ta cla pa fiha un fecha pa e caso mes keda trata integralmente. 

Hues a palabra cu 14 Juni 2022 pa 11’or di mainta, lo topa den sala di Corte pa mira con leu a yega cu e interogacionnan y asina planea kico lo bay sosode cu tratamento di e caso Avestruz.