Ex Esso Club lo bira un Boutique Condor Hotel

ORANJESTAD – Mientras cu e desaroyo di e hotel Secrets na Colony ta para temporalmente, un otro proyecto hotelero eybanda mes, Condor Boutique Hotel, a keda anuncia den fin di siman. Desaroyador Alberto Perret Gentil di Perret y Perring Group, a anuncia un proyecto hotelero balora na 30 miyon florin, unda cu lo converti loke awor ta resto di Nanky Country Club (Ex Esso Club) den un boutique hotel di 2 piso conteniendo 40 camber y un piscina y gym. E grupo ta responsabel pa varios proyecto hotelero manera Blue, Azure y Ocean na Palm Beach y mas recien Harbour House na Playa. 

DESAROYO

Segun e desaroyador, ta premira cu lo dura un aña of menos pa keda cla cu e permisonan necesario, pa despues durante un pa dos aña, completa e construccion di e hotel. Durante e construccion, lo tin empleo pa entre 50 pa 60 persona, y unabez cu e hotel ta operacional, esaki lo genera empleo pa entre 10 pa 15 persona. E proyecto mes ta riba mesa for di 2016, y finalmente a keda cla cu gobierno pa haya e opcion pa e tereno pa por desaroya esaki. A gradici gobierno, primordialmente minister di infrastructura Evelyn Wever y San Nicolas Business Association, cu tabata instrumental den esaki.