Caso Avestruz ta continua awe mainta pro forma den corte

ORANJESTAD – Awe mainta ta continua e tratamento di e caso Avestruz, pero den pro forma, cu ta involucra tambe ex minister y actual parlamentario Benny Sevinger. Despues di e prome regiezitting algun tempo atras, abogadonan e tempo ey a pidi pa mas tempo pa por procesa e sero di documento cu nan a ricibi fin di December di aña pasa, y mester a pasa door di esaki, pa e ora dicidi si nan mester di mas tempo pa p.e. scucha mas testigo of mester di mas preparacion. Hues dado momento a otorga esaki, esta pa bin cu un di dos regiezitting, pero a laga cierto peticionan afo. Si ta bon, awe pues abogadonan lo informa kico nan peticionan extra lo ta, pa despues hues stipula un fecha definitivo pa trata e caso den contenido completo. Ta premira cu pa prome cu zomer, esaki por wordo trata den su totalidad. Fuera di ex minister Sevinger, tin por lo menos 10 sospechoso cu tambe tin cu defende nan curpa. Mescos cu biaha pasa sinembargo, den e caso di awe, e sospechosonan lo no tin cu presenta dilanti mesa berde, aunke esaki por cambia. Den e caso di Avestruz, tin por lo menos 5 cargo penal contra e ex mandatario, di cual fraude, y forma parti di un organisacion criminal ta forma parti di dje tambe. E caso ta inicia pa 11’or awe mainta.