Radio FM nobo pa Aruba dedica na añanan 80 ta inicia transmission di prueba

ORANJESTAD – Despues di hopi dolor di cabez, e rumanan David y Benjamin Filipos a logra nan soño, esta pa lanta e prome radio FM na Aruba completamente dedica na musica 80, yama ‘Always 80’s. Manera ta conoci, e genero di añanan 80 ta sigur uno cu ta masha reconoci aki na Aruba, y ta wordo usa hopi biaha como un tema di fiesta popular. Den e caso aki, durante curso di aña, un frecuencia a habri porfin, y mesora e duo aki cu ayudo di amigonan local, a yuda lanta e canal aki y den silencio durante un aña, a traha riba esaki. Manera nan tata Izaak a confia na noticiacla, “Nan a cana cu e idea aki masha masha aña y mi a sostene nan te na final” e tata emocionalmente a bisa. Finalmente ta asina leu cu e canal ta lansa su señal di prueba diasabra awor, y si tur cos bay bon, nan lo lansa oficialmente 1 di mei proximo. “E no tabata nada facil”, Benjamin Filipos a confirma na noticiacla e siman aki. Via amigonan mutuo, a sa di convence nan pa adelanta e noticia, y asina presenta e primicia aki pa e portal aki. E canal lo ta primordialmente digital automatico, pero lo toca tur genero di añanan 80, osea latino, ingles, disco, reggae y mucho mas. Mirando cu technologia ta asina avansa, no ta necesario pa tin asina hopi ekipo, ni edificio, y como tal, a logra set up den un area pariba di Alto Vista, pa asina e area por traha sin problema.