Pareha mericano ta demanda mesun compania envolvi cu accidente acuatico di siman pasa

BOSTON – E pareha mericano Morelle y Suzanne Crawford tambe ta victima di un accidente acuatico na Aruba y ta demandando e compania pa 250 mil dollar na daño. E pareha a papia e siman aki riba television mericano riba e loke a sosode siman pasa na Aruba, y a conta di nan propio experiencia di e tempo ey. Tabata na November di aña pasa cu e pareha aki a bay experencia Parasailing cu e mesun compania acuatico, Fun 4 every 1, ora cu nan experencia a bolter literalmente den un accidente cu a laga nan herida severamente. Nan ta conta cu ora cu nan a bay laria, diripiente nan dos a bira boca bou y cay y kibra varios parti den nan cara. Varios operacion despues, unda cu mester a pone pida hero den nan cara, nan bida nunca mas lo ta mescos y e cara di e homber ta un poco desfigura awor. Parce cu ta e cabuya cu tabata wanta nan, a kibra cu a pone cu cos a bay fout. Nan ta cuestiona e hecho cu despues di nan accidente, con ta posibel cu e e compania por ta envolvi den otro accidente y e biaha aki tragico. Nan storia a keda televise pa e filial di e cadena mericano NBC. Por wak e raportahe AKI.