Gobierno di Corsou tambe a cuminsa delibera cu Hulanda pa revoca 12.5%

WILLEMSTAD - Awor ku a bira konosí ku ya gobièrnu di Kòrsou no tin mester di sosten di likides, Gobièrnu di Kòrsou a kuminsá ku deliberashonnan kaba ku Hulanda pa wak te kon leu lo por revoká e 12.5% ku ta ser kitá for di ámtenarnan i algun otro entidat supsidiá dor di gobièrnu. Ta deliberando ku Hulanda riba e tópiko i posibilidat ei. Esei ta e úniko informashon ku Minister di Finansa sr. Javier Silvania a kompartí ku Parlamento di Kòrsou ayera mainta.

Referiendo na e tópiko di impuesto, el a bisa ku ora trata di impuesto, ta normal ku un entidat ta hasi un komparashon di su entradanan di e aña aktual i e presupuesto korespondiente. Tambe bo ta kompará e entradanan aktual ku esnan di aña pasá. Pero den e komparashon di e último kuater añanan a tene kuenta ku no por kompará añanan 2019 ni 2020 sin mas pa motibu ku na 2019 e ofisina di servisio di impuesto a ser kimá, miéntras ku na 2020 tabatin e pandemia.

Segun Silvania, a opta pa pone aña 2018 den e komparashon ya ku aki no tabatin ningun estorbo. Si wak e periodo di yüni te ku desèmber 2021, por bisa ku esaki tabata e mihó aña den e periodo aki. Dor di e maneho aktual gobièrnu ke duna tur hende un trato igual, i pa duna mas transparensia riba kiko ta kada ken su deber pero tambe kada ken su derecho basá riba e kondishonnan di kobransa di impuesto.

Revoká e 12.5%?

Tin parlamentarionan ku a puntra gobièrnu si awor ku no ta nesesario pa risibí sosten di likides, si no ta momentu tambe pa revoká e 12.5% ku ta kitando for di ámtenarnan. E mandatario a duna di konosé ku gobièrnu ta deliberando kaba ku Hulanda riba e tópiko aki di 12.5%.

Manera ta konosí, un dje parlamentarionan ku a bin ta mustra riba e punto aki ku insistensia ta sra. Giselle McWilliam, ya ku esei tabata un dje promesanan ku a ser hasí den pasado. Di otro banda, si bai bèk na e nivel di gastunan di personal manera ántes, e lo tin efekto naturalmente riba presupuesto i e totalidat di gastunan di gobièrnu. NOTA: Texto ta scirbi den Papiamento fonetico di Corsou.