AZV no ta cuminsa cobra ‘contribucion propio’ otro siman

ORANJESTAD – E asina yama ‘contribucion propio’ of ‘eigen bijdrage’ na salud, no ta inicia otro siman manera cu ta wordo papia. Asina director di AZV Edwin Jacobs a sigura diabierna mainta den un conferencia di prensa. E motibo ta cu legalmente esaki no ta asina leu ainda. Ta premira cu sea pa 1 di mei of 1 di juni esaki por keda legalisa. Pero e ora ainda no ta nifica cu e momento ey e introduccion lo tuma lugar si, Jacobs a splica. 

MAL INFORMACION

E director a lamenta cu for di siman tin gritonan den veld medico, ta crea panico y/of confusion pa cu e situacion aki pasobra nan tabata presente den e reunionan cu a splica cla cu e introduccion legal no ta tuma lugar dia 1 di April, osea otro siman. Pesey e la lamenta e forma con ta fomenta noticia y crea panico innecesario. 

CAMPAÑA

Segun sr Jacobs, Parlamento mester haci cambio di e ley di AZV, particularmente articulo 22, pero e ley ainda no a ni yega Parlamento. Y unabez cu e yega, e mester keda eynan por lo menos 15 dia pa observacion. Y ta despues e por cuminsa cana su caminda. Pues dificilmente por papia di introduccion di e ‘contribucion propio’ entrante 1 di April (otro siman), manera cu tabata e intencion. Y ademas, sr Jacobs a clarifica cu si keda cla mes pa p.e. pasa e ley pa 1 d April, ta rekeri un periodo di transicion pa informa tur hende debidamente y prepara tur instancia necesario  involucra, pa nan ta prepara pa ehecuta esaki. Pues, analisando e ponencia aki, lo dura un tempo sigur ainda, prome cu por papia cu lo cuminsa cobra ‘contribucion propio’.