Morto di e hobencita turista na Aruba a bira noticia grandi na Boston

CAMBRIDGE – Manera por a spera, e morto di e hobencita Mericano di apenas 13 aña, a bira noticia grandi den su ciudad. Por lo menos 4 canal di television y corant grandi a raporta e storia den nan noticiero e siman aki. Ta trata di Cassidy Murray(13), un studiante di Buckingham Browne & Nichols School na Cambridge. Diabierna e famia a publica un declaracion y un potret di nan yiu muher. Varios medio di comunicacion Mericano a publica e storia, unda cu ta raporta cu e hobencita a fayece despues di un accidente cu un boto. “Nos ta gradici tur hende pa nan amor y sosten y ta pidi pa duna nos tempo y espacio pa nos procesa e perdida dificil aki”. E cabesante di scol a anuncia e noticia tragico pa tur alumno den e estado. Cassidy tabata un mucha muher vibrante cu a caba drenta den 7e klas, unda cu su ruman homber di 10 aña tambe ta atende. Diasabra awor tin un session na scol pa alumno y mayornan por atende cu e situacion cu a presenta awor.