Na Corsou 4 drone grandi di defensa a yega

WILLEMSTAD - Ayera durante henter dia, outomobilistanan por a tuma nota di un transporte ku a tuma lugá bou di guia polisial.

Esaki tabata un transporte di ekipo spesial di marina. Ta trata aki di 4 drone basta grandi i sofistiká. Aparte ku e drone nan mes ta basta grandi, tabatin basta ekipo ku a bini aserka pa asina forma parti di e base.

For di na komienso di aña, Defensa militar di Hulanda a duna di konosé ku lo kuminsá utilisá drone pa bula den nos region pa kombatí transpòrt di droga. Ta trata di e drone tipo MQ-9 Reaper ku lo bula over di Kòrsou. Nan lo usa vários sènsòr pa por detektá situashon nan ilegal riba i rondó di nos isla. E drone tin e mesun tamaño di un avion chikitu. A skohe Kòrsou pa por instalá e base debí na e bon wer i e aksesibilidat di nos situashon teritorial.

Ya a kuminsá instalá dos base na HATO pa asina e drone nan por kuminsá funshoná. No sa ainda ki dia e drone nan aki lo kuminsá operá. Aparte di tareanan pa defensa ku e drone nan lo mester efektuá manera e.o operashonnan anti droga, tambe nos outoridatnan lokal por hasi e petishon pa vigilansia i investigashon.

No ta konosí pa kuantu tempu e drone nan aki lo ta den funshon i tampoko si lo bini mas.NOTA: Texto ta scirbi den Papiamento fonetico di Corsou.