Arends: Aruparking ta operacional y lo conoce cambionan pronto

ORANJESTAD – Contrario na pensamento eifo, e departamento di control di parkeo publico, conoci como AruParking ta operational. Asina e minister encarga cu transporte, Ursell Arends a sigura noticiacla diahuebs. “Pero e parkingmeters no”, e mandatario a admiti. Y por a compronde cu pesey porta e controlnan no ta wordo eherce mas. Pero a compronde di e mandatario, cu cos lo cambia pronto. E minister responsabel pa e cartera aki den e gabinete anterior a priminti mescos e tempo ey, pero e minister ey ( Chris Romero) a bin te bay, y nunca mas a atende cu e problema aki. 

PLAN PA MINISTERRAAD

Segun palabra di e minister aki, e si tin pensa di haci algo awor. “ Nos ta trahando riba un plan cu pronto lo wordo presenta den ministerraad” e mandatario a sigura e portal aki. Ademas, e la sigura cu tur aspecto cu lo no ta funcionando of a funciona robez, lo keda atendi. “Nos a tene cuenta cu tur e esaki den e proposicion nobo” e mandatario a sigui bisa, refiriendo na e proposicion cu lo presenta den conseho di minister proximamente. 

ARUPARKING 

E concepto di Aruparking a bin na 2015 bou di e tempo ey minister Otmar Oduber. E intencion tabata pa regula e parkeo den centro di ciudad pa asina por a optimalisa e trafico y parkeo di tal forma cu e por a beneficia tur partido. Rapidamente esaki a bira un problema ora cu a cuminsa multa hende pa mal parkeo, incluyendo e famoso klem na wiel. Despues, cu resistencia den comunidad, particularmente comercio, a cuminsa haci cambionan aki aya. Tabata hunga cu e orario di operacion, y cambio pa loke ta e klem. Asina cu e minister a retira, e gobierno na mando, a tuma control di e operacion y a trece aun mas cambio. Cambio di ley tambe a pone despues cu no por a multa hende mas, pero si por a usa e meternan. Cu esaki, a crea un loophole di tal forma cu e compania a cuminsa perde entrada y a pone e existencia di e compania na peliger. Ora cu gobierno nobo a sinta, e minister e tempo ey Chris Romero, a priminti cu e lo a cambia e structura y hacie uno mucho mas miho. Pero e minister a bin te bay, y nunca mas a tende algo di Aruparking. E compania a sigui opera, pero mas y mas tabata mira menos movecion di entre otro controlnan di parkeerwachters. Te dado momento a kere cu e compania, no ta operacional mas. Pero 7 aña despues cu a crea e departamento aki, e minister actual ta sigura cu e compania ta sigui existi y cu e biaha aki si tin cambio na caminda.