Extra: Muryad de Bruin lo bira proximo director di oficina di turismo di Corsou

WILLEMSTAD -Tur kos ta indiká ku sr. Muryad de Bruin lo bira e próksimo Direktor Statutario di Ofisina di Turismo aki na Kòrsou. Asina e matutino Extra ta raporta. E ta e persona prinsipal ku a keda ofisialmente postulá dor di Minister di Desaroyo Ekonómiko, kende a pidi konseho di SBTNO riba su kandidatura. Mester bisa ku e konsehero aki a duna di konosé ku, poniendo tur e konsiderashonnan den balansa e no ta mira ningun opheshon kontra nombramentu di De Bruin den e funshon.

Den su konseho SBTNO ta stipulá di un forma kronológiko kon e proseso di kandidatura a kana i kon finalmente a yega na e kandidato di De Bruin. T’asina ku for di kuater aña pasá ku a atraé i pone sr. Paul Pennicook den e funshon di direktor, esaki a bai kondishoná, ku lo a nombra òf apuntá un persona ku lo mester a fungi komo ‘counterpart’, pa finalmente e tuma e batuta over na momentu ku e kontrakt ku Pennicook lo a terminá na òktober 2021.

Ta konosí tambe ku kosnan no a kana manera planiá, ya ku no a nombra ningun hende, miéntras ku Pennicook su kontrakt a ser terminá sin ‘counterpart’, i komo tal e kiebro den relashon di trabou aki a terminá ku sintimentunan miksto. Entretantu sr. Hugo Clarinda a sigui na timon di CTB, meskos ku el a bin ta hasi esei komo suplente pa hopi aña i riba un trankilidat manera su personalidat ta reflehá.

E proseso pa yega na un ‘counterpart’ pa e direktor statutario a start ofisialmente for di febrüari 2021. Un kantidat di 17 persona a reakshoná riba e aviso, pero a base di nan datonan a selektá 8 pa ser entrevistá. E entrevistanan a ser hasí dor di algun eksperto i bou di supervishon di e kònsùltent Deloitte. Den e siguiente buèlta a invitá 3 kandidato, i finalmente a konkluí e proseso ku 2 hende. E kandidatura di De Bruin ta algu ku a keda presentá den reunion di Konseho di Minister, i ku e mandato aki Minister a postul’é. NOTA: E texto ta scirbi na Papiamento fonetico di Corsou.