Na Corsou tabatin tiroteo pafo, despues di discusion den nightclub cu saldo di 4 herido

WILLEMSTAD - 4 persona a resultá heridá durante un kaso di lòsmentu di bala formal ku a tuma lugá ayera mardugá den Saliña. 3 di e personanan aki a keda heridá inosentemente.

Ayera alrededor di sinku pa kuater di mardugá, Polis a keda dirigí pa un klup nokturno den Saliña pa un kaso di tiroteo. For di investigashon preliminar a sali na kla ku dos hòmber tabatin problema ku otro den e diskotèk. Na momentu ku nan a sali pafó, un otro hòmber a lòs algun tiru dirigí riba un di e hòmbernan aki.

E víktima a risibí bala na altura di su boka i ku su mes vehíkulo el a kore bai sala di emergensia di C.M.C. Tres otro persona den besindario di kaminda e tiramentu a tuma lugá, ku no tabatin nada di aber ku e kaso, tambe a keda alkansá pa tirunan.

Dos di e víktimanan a keda transportá den outo partikular pa C.M.C., miéntras un otro a keda hibá hospital ku ambulans. Na e sitio di e tiroteo polisnan a sera e área kompletu pa por kuminsá ku e investigashonnan nesesario. A haña vários huls na e sitio ku a keda konfiská.

Vários polis a bai CMC pa asina por kuminsá ku e investigashonnan. Ambos vehíkulo ku e víktimanan a yega den dje tabata tur na sanger tantu paden komo pafó. TOD tambe a presentá na e sitio pa por kuminsá ku e investigashonnan nesesario. Polis a konfiská un vehíkulo i investigashon den e kaso aki ta kontinuá. Tin tur indikashon ken ta e persona responsabel pa e kaso aki, pues lo no dura hopi pa polisnan pone man riba dje. NOTA: E articulo ta scirbi na Papiamento fonetico di Corsou.