Na Corsou, miembronan RvC di Fundacion Kas Popular a tuma retiro “en bloc”

WILLEMSTAD - Miembronan di e komisariado di Fundashon Kas Popular (FKP) a disidí di tuma nan retiro inmediato, esaki ta algu ku a sosodé na prinsipio dje siman aki. Esei EXTRA por a komprondé for di su informantenan den e dianan ku a pasa. Segun nos fuentenan, e desishon aki a kai for di djadumingu i karta a bai pa gerensia ku e retironan lo drenta na vigor al momento.

EXTRA tabatin kontakto ku un otro persona hopi ligá ku e fundashon i esaki solamente por a duna konfirmashon dje éksodo, aunke den e mesun rosea el a splika ku, di akuerdo ku statutonan di e fundashon enkargá ku konstrukshon di bibienda popular, na momentu ku sosodé algu manera esaki, e personanan lo tin di duna espasio pa un periodo di transishon. Mr. Chester Peterson si a keda na timon dje barku, aunke e lo no por tuma desishonnan klave riba su so.

Motibu di desishon:

Nos informantenan a splika ku e desishon dje kuater miembronan en kuestion lo tin di haber ku e minister enkargá ku Bibienda Popular, sr. Charles Cooper. Aparentemente e komisariado i e mandatario no tabata riba e mesun liña pa loke ta su deseonan i vishon pa kumpli ku e meta dje fundashon.

Minister Cooper:

Den un reakshon pa EXTRA ayera nochi Minister Cooper a duna di konosé ku ofisialmente e no a mira e karta di retiro, pero e ta asumí ku lo ta asina ya ku den “wandelgangen” el a ser informá di un ke otro.

El a splika ku, e miembronan di RvC no mester kulpa e, sino nan mes! Echo ta ku FKP ta un “puinhoop” pa hopi tempu i no ta kumpliendo ku su meta, ku ta konstrukshon di kas pa pueblo. FKP no ta kumpli ku reglanan di Maneho Korporativo (Corporate Governance) p.e. no tin kuentanan anual. Esaki tabata motibu pa el a kuenta i rason na RvC dikon nan no ta kumpliendo ku reglanan di Maneho Korporativo.

E lei di Maneho Korporativo ta bisa ku no por retirá nan sin mas i ku tin un trayekto ku tin di kana si bo ke yega asina leu. I e ta kere ku (taba)tin motibunan pa retiro. Primeramente el a duna nan oportunidat den un seshon spesial (hoorzitting). Nan por a hasi esei sea verbal òf por eskrito, pero el a opta pa e último. Si a yega asina leu, e lo mester a presentá su kaso tantu den Konseho di Minister pa sosten i serka e konsehero SBTNO pa un desishon final.

Segun sr. Cooper, si nan tabata sinti ku nan ta fuerte pará den nan sapatu, nan lo a para duru kontra dje. Pero nan sa ku tin kosnan fo’i regla ta sosodé i komo tal nan lo a benta sèrbètè den ring i bati retirada. NOTA: Texto ta den Papiamento fonetico di Corsou.