Wever: Hues kier sinta riba stoel di gobierno den caso di recorte salarial

ORANJESTAD – Awe ta e ultimatum cu hues a duna gobierno pa bin cu un plan structural con pa baha gasto y reemplasa e recorte di 12.6%. Prome minister Wever Croes den un reaccion pa noticiacla recientemente a bisa cu Hues kier sinta riba stoel di gobierno den e caso di corte pa loke ta e asunto di 12.6%. “Mi ta kere cu hues ta bayendo hopi den direccion si di sinta riba stul di gobierno”, e mandatario a bisa, aunke cu e ta compronde esey tambe, refiriendo riba e peticion cu hues a haci na gobierno.  “Y cu gusto nos ta lag’e tambe yega cerca di e stul pa e sinti kico ta locual nos ta pasa aden”. Mes momento e mandatario a bisa cu gobierno ta practicamente cla pa contesta hues den e prome sentencia temporal cu a bin di e caso contra SIMAR y SEPPA recientemente.

E CASO

Hues durante su veredicto dia 2 di maart ultimo a duna gobierno te awe pa bin cu un solucion, pa despues duna sindicatonan te dia 30 di maart pa bin cu nan solucion. Y finalmente pa mitar di April, e hues lo mester a presenta un posibel solucion si partidonan no haya otro. Segun e prome mandatario, nan ta cla caba. “Nan ta cla caba!” e mandatario a bisa rapidamente. Cu esaki e ta referi na e peticion di hues.”Nos a bisa hues cu nos tin nan cla caba. Nos ta den negosacion cu Hulanda. Nos ta negosha cu palabra, nos ta negosha cu documento” e mandatario a sigui bisa. E momento ey e mandatario no a lesa e dos sentencianan di 10 pagina cada uno, pero a haya un splicacion breve di su ekipo legal. Mes momento e ta mustra cu hues ta ekiboca den su ponencia.”Hues ta conclui si cu Hulanda kier wak un plan structural pa stop e inkorting. Esey no ta asina” e mandatario a sigura noticiacla. “Mi ta kere cu (secretario di estado Hulandes) van Huffelen a bise hopi bon. Nan (Hulanda) kier pa y nos baha structural, pero nan no kier pa nos stop e inkorting”. A cuminsa prepara e documentonan pa presenta na hues, aunke cu e ta bisa cu e tin nan cla caba. Con cla, no ta conoci e ora. 

E VEREDICTO

E mandatario ta haya e veredicto temporal como uno bon balancia. Aunke cu e ta bisa si cu e hues ta bay hopi den direccion di sinta riba stoel di gobierno. Esaki pasobra e hues kier dicta kico gobierno tin cu haci pa cu Hulanda. E interpretacion cu e mandatario a duna e veredicto temporal, ta cu e sindicatonan no por bay den accion ainda, y cu no por traha menos ora tampoco. Pa loke ta gobierno, e hues (segun e mandatario) a bisa pa dun’e e plannan pa e pidi e sindicatonan dune nan opinion. “Y basicamente, Tito, esey ta loke ami tabata kier semper”, e mandatario a sigui bisa. 

HUES A PIDI ALGO CU E NO POR

E mandatario a sigui mustra cu e loke cu hues a pidi den e caso, e no por pidi. Por lo menos segun e abogadonan di gobierno. E no ta algo cu gobierno por pidi tampoco. “Hues kier pa bin cu un plan pa stop e inkorting”. Pero segun e mandatario, no ta esey ta loke Hulanda kier. Hulanda no kier para e recorte, y ni maske bo bin cu mil plan, Hulanda lo no concede na esey.