Aruba a recupera mas lihe cu a kere di e blackout di awe di WEB

BALASHI – Contrario na informacion inicial, e planta di awa WEB Aruba NV a recupera di e blackout di awe diamars mainta mas lihe cu a kere. Si inicialmente a raporta cu e fayo cu a laga Aruba completamente ‘den scur’ for di 11’or y mei di mainta lo a dura 4 pa 5 ora prome cu por keda cla, esaki a keda cla hopi mas lihe. Den algo mas cu un ora, e prome barionan a cuminsa ricibi coriente bek. Un fayo den e planta, specificamente e generator number 5 a conoce un problema cu e breaker, segun fuentenan cerca di e problema. Ora cu e blackout a surgi, no tabatin informacion di cuanto tempo e lo a dura, pero despues a indica cu pa 4 pa 5 ora esaki lo por a keda asina. 

RECUPERA

Despues pa 12:41 e prome mensahenan a cuminsa drenta di recuperacion inicial, unda cu a recupera suministro di coriente na barionan di Sta. Cruz, Paradera, Sabana Berde, Playa un parti. Pa 1:13 pm a bira conoci cu WEB a recupera 60% di suministro di coriente pa N.V. ELMAR . Esaki ta bay mas liher cu a spera. Pa 1:49pm, WEB a recupera 80% di suministro di coriente pa N.V. ELMAR  y cu entretanto area di Tanki Leendert tambe a haya coriente. Y pa 1:54pm, WEB a recupera 85% di suministro di coriente pa N.V. ELMAR . “Entretanto tur motor RECIP ta den operacion. Awor falta pa e boilernan lanta, esey lo tuma mas tempo, ta calcula mas o menos 1 ora y mey” WEB a bisa. Despues no a tende un update mas pero ta premira cu pa 4’or Aruba completo lo mester tabatin coriente bek.