Homenahe pa recorda 40 aniversario titulo Maureen Ava Vieira

ORANJESTAD - UNOCA a uni  forsa cu Atan Lee pa asina duna Maureen Ava Vieira un bunita homenahe pa recorda cu 40 aña pasa e la sali 4th runner up di Miss Universo na 1974. Maureen, maximo faborito pa a bira Miss Universo na 1974, na Filipinas, a logra e titulo di cuarta finalista di Miss Universo y tambe Miss Press. Mas di un biyon di televidente a mira e show y Maureen a competi cu 65 pais rond mundo, y asina mes cu su carisma, e hospitalidad Arubano a sa di conkista curason di e pueblo di Filipinas, prensa mundial y di e miembronan di Hurado. E homenahe ta tuma luga dia 20 di maart y lo ser transmiti en bibo y directo via Tele Aruba, for di Fort Zoutman, cuminsando pa 9’or di anochi.

HOMENAHE

Durante e homenahe lo actua e grupo Melange bou direccion di señora Maybeline Arends Croes y The Popcorn Dancers bou direccion di señor Freddy Tromp, acompaña pa un gran produccion. E mes un anochi aki lo keda batisa un buki cu Atan Lee a skirbi dedica na Maureen titula: E exito ta den bo man. Un buki educativo con pa prepara un reina, un miss pe tin exito den cualkier competencia Internacional. E buki lo ser bendi exclusivamente na Peanuts Restaurant, desde dia 21 di maart. Por menciona cu UNOCA  a tuma e idea aki cu brasa habri, ya cu nan ta considera cu e ta un bunita manifestacion cultural na honor di un gran yiu di tera. For  di e cantidad di peticion cu a ser haci na comercio, es nan cu te cu awe a coopera ta  Hi Performance, Setar n.v., Romar Trading, Compra n.v., Caribbean Mercantile Bank, Botica Paradera, William Cheng, Peanuts Restaurant, Mayrin cu Ralph Croes Guda, Humphrey cu Marisol Croes Marchena, Rudy cu Odalys Croes Dominguez, Nilda Koolman, kende a coregi e buki. Es nan cu ainda ta desea pa contribui pa yuda den cubri e gastonan halto cu esaki ta hiba cu ne por yama na 5628344.