Opinion: Carta habri na sr. Hendrik Tevreden di Partido MEP

Opinion: Carta habri na sr. Hendrik Tevreden di Partido MEP

Posted on 09/13/2021 11:19 am AST | Updated on 09/13/2021 11:21 am AST

Apreciabel Hendrik,

Como amigo y como candidato politico di nos barionan di Dakota, Tarabana y Wayaca ariba lista di Partido AVP, mi ta dirigi mi mes na bo pa comparti lo sigiuente.

Bo ta un bon amigo di infancia. Mi ta corda ainda tempo cu nos tabata hunga hunto na YMCA Dakota. Tanto bo carera como trahado social, como bo trabou politico, tabata un inspiracion pa mi y probabelmente pa otro hobennan den bario. Bo a mustra nos cu un simpel hoben di Dakota por a studia y traha pa yega na ocupa posicionnan importante den nos pais, pa asina bo por yuda mas y miho den desaroyo di nos pais. Esey ta alfin e meta di politica.

Diahuebs 9 di September ultimo Aruba a conose un constelacion di minister nobo. E noticia aki tabata tin un impresion inespera grandi den comunidad. Enbez di un sentimiento di alegria y speransa, e noticia aki a haya un reaccion negativo den comunidad. E motibo ta obvio: awor aki nos pais tin mester di nos miho hendenan den e posicion di minister y parlamento y e miho plan, pa saca nos pais di e multiple situacionnan sumamente dificil cu e ta aden. E pobresa ta grandi y doloroso. Diversificacion concreto di nos economia ta indispensabel. Enseñansa mester hunga un rol hopi mas directo den desaroyo di nos pais y pesey mester di un empuhe grandi pa renova di forma cu tur esan cu te ainda a keda atras, porfin por sali padilanti.

Den e ultimo dianan despues di a combersa cu amigo y famiyanan den Dakota, Tarabana, Primavera, Wayaca y otro partinan di Aruba, a bira evidente pa mi, cu no ta ami so tabata sinti un decepcion grandi cu e constelacion di ministernan nobo na e momento critico cu nos pais ta aden. Parti di e decepcion aki tabata cu abo no a wordo nombra como minister.

Mi a tuma nota di bo mensahe riba rednan social den cual bo ta desea bo coleganan sr. Tjon y sr. Croes hopi exito y pa nan sigui traha duro pa e progreso di nos pais. Cu esey bo kier a mustra grandesa y cu bo no kier a crea e impresion di kier “bringa pa un stoel”. Sinembargo, e impresion cu e mensahe a crea serca hopi hende, ta cu bo tabata sa cu abo mester a bira minister, pero cu bo a laga otro pasa bo dilanti.

Aki ta caminda cu como politico aspirando pa yuda den desaroyo di nos pais riba areanan specifico manera e area social, hubentud y enseñansa, mi ta haña cu bo mester a lucha mucho mas duro. Lider di bo partido mes a bisa cu e meta di politico no mester ta pa “bira minister”. Cu otro palabra, ta bay pa loke e politico por contribui cun’e na desaroyo di nos pais, cu su experiencia y conocemento. Hopi hende a desea di wak bo mustra lider di bo partido cu Abo ta !the right candidate for the job” den bo partido awor aki.

Den bista di hopi hende, den bo partido Abo ta miho capacita pa e funcion di minister cu esnan cu a wordo nombr’a. Bo imagen como politico y experiencia riba areanan cu mi a menciona, ta hacibo claramente uno mas corecto den bo partido pa ocupa e funcion halto aki. Tambe mirando e imagen y situacion andando cu bo coleganan sr. Tjon y Croes.

Bo a mantene bo posicion den parlamento. Ta bon pa bo sa kico esnan cu a vota pa bo ta spera di bo awor. Nan lo no kier pa bo bolbe keda solamente !Tevreden” cu e posicion den parlamento, pero pa bo usa esaki den forma constructivo pa sigura e maneho cu Abo lo tabata kier wak den areanan social, di hubentud y enseñansa. Pa logra esey Abo ta e “yabi“ den bo fraccion y den parlamento. Di lo contrario, e desicion di “accepta” pa keda den parlamento lo por bira tambe un “mistake” asta mas grandi den bo carera politico. Como amigo y hasta como politico, mi no ta desea pa bo hasi un “mistake” mas grandi asina ey.

Un saludo cordial, Gregory Bronswinkel

 

  • Powered by SETAR