OPINION: FRAUDE ELECTORAL?

OPINION: FRAUDE ELECTORAL?

Posted on 05/9/2021 4:43 pm AST | Updated on 05/9/2021 4:46 pm AST

Skirbi pa Armand Hessels 

Di biaha despues di e anuncio di Conseho Electoral cu den e proximo elecshon e lo kier haci uzo di un sistema di scan pa reduci e riesgo di contagio y acelera e proceso di conteo, AVP a reacshona cu e acusashon cu ta trata di un intento di gobierno pa salbaguardia su re-elecshon pa medio di fraude electoral. Asta despues cu Conseho Electoral/Director di Censo a declara den varios ocashon cu ta trata di nan propio iniciativa y cu di ningun manera por influencia e resultado, ni cu por averigua e elecshon di votador, AVP a sigui mantene su posishon. 

Conseho Electoral

Den henter e polemica aki por reprocha Conseho Electoral (CE) cu e, manera ta di custumber na Aruba, a trece un adaptashon importante den e sistema di votashon na ultimo momento den e discsuhon publico. Segun CE, e intenshon tawatey pa varios aña, pero inesperadamente a haya mas urgencia pa motibo di e pandemia di covid. Riba dje e acelerashon inespera di elecshon a contribui na e apuro pa adapta e Reglamento di votashon dor di un parlamento debilita cu na e momento aki ademas te den e ‘modus di campaña’. Esey ta trece e riesgo cu n’e cu no ta analisa e proyecto debidamente.

Oportunista

Anke ta na su luga pa critica e proceder aki, ta totalmente absurdo pa dun’e di biaha e etiketa di ‘fraude electoral’. Esey ta crea e impreshon fuerte cu e partido concerni ta probecha di e oportunidad aki pa, mescos cu ex-presidente Trump, ‘splica’ di antemano e perdida electoral anticipa. Esey ta logico: cu un ministro cu a keda sentencia pa corte den prome instancia pa corupshon y participashon na un organisashon criminal (caso-IBIS); un otro ex-ministro cu ta e sospechoso principal den un caso di corupshon extenso di cual su compinchinan hustamente den e periodo aki (t)a keda encarcela pa un tempo cortico of mas largo (caso Avestruz); y otro ex-exponente importante cu inicialmente como ministro di AVP y despues di POR tambe ta sujeto na investigashon hudicial (caso Flamingo), AVP na e momento aki no ta inspira ningun tiki di confiansa na e electorado. Consecuentemente e acusashon di AVP na Ministerio Publico cu aki ta trata di ‘persecushon politico’ ta disparate completo.

Etcetera

Pero tambe e enrikecimento vergonzoso di otro ex-ministro, entre otro pa medio di e aventura fracasa di Citgo; e secrecia hermetico pa cu e contrato di Citgo; e gastonan enorme di e fracaso grandi den caso di e hedge-deal; e desbordamento espantoso y inaceptable di finansas publico y consecuentemente di e debe publico; e obligashonnan enorme como consecuencia di e proyectonan intransparente di PPP, etc. ta contrubui na e imagen negativo di e partido. A base di esey ta dudoso si AVP tin algun credibilidad moral ainda pa denomina e iniciativa di Conseho Electoral como fraude electoral. Pesey tambe e acusashon ey maximo por aporta na reacshon emoshonal dentro di e propio nucleo di fanatico mientras cu alabes e por kita e atenshon di comunidad for di e casonan di corupshon.

Labamento di placa?

Pa por recobra algun confiansa, ta necesario pa e partido bira completamente transparante riba un termino mas cortico posibel. Pa cuminsa cu e lider di partido cu mester duna un splicashon satisfactorio pa e contribushon di parti di Roberto Rincon na september 2016 di US$ 49.950 na su fundashon di campaña. A aresta Sr. Rincon ya caba na december 2015 na EEUU pa motibo di corupshon/labamento di placa. Na juni 2016 Rincon a admiti su practicanan coruptivo di mas di US$ 1 biyon (mil miyon!) pa medio di PDVSA den combinashon cu labamento di placa. Pesey tambe nos prome ministro di e tempo ey mester tawata na altura di e reputashon cuestionabel di Rincon. Pues e mester por a conta riba su dedenan cu e suma(nan) cu el a ricibi di Rincon probablemente tawata resultado di delito (corupshon). Pesey tambe lo por considera e uzo di e placa aki, como si fuera a ricibi’e legitimamente y su uzo pa meta personal (campaña), como labamento di placa. Como cu mas exponente di AVP tambe a ‘deal’ (intensivamente) cu Rincon pa motibo di otorgamento di tereno y ‘negociashon’ tocante e refineria, lo no ta nada straño si e miembronan di partido ey tambe a ricibi suma substancial riba nan cuenta di campaña. Como tal AVP lo por a comporta su mes como un machin di laba placa. Pasobra e sumanan aki ta procedente di un pais cu ta considera internacionalmente como sumamente corupto te na e nivelnan di mas halto. Sinembargo, segun e percepshon di su propio pueblo pa medio di encuesta di Banco Central, Aruba no ta mucho diferente. Den e cuadro aki e recien ‘Aruba Money Laundering Report 2021’ tambe ta mustra riba e abuso di poder di parti di ministro y otro funcionario publico. Den esey parlamento no lo ta dispuesto pa investiga esaki seriamente si e lo afecta e posishon di nan propio ministronan.

Tranparencia!

Como cu ta trata di sospecho serio, den e cuadro aki ta importante pa partido AVP duna transparencia total den administrashon di e fundashonnan concerni. Pa un partido cu (mientras e ta den oposishon!) ya caba for di comienso di añanan ’90 ta boga pa transparencia den financiamento di partido, esaki ta un oportunidad unico. Posiblemente esaki lo por yuda e partido na saca e sospecho di fraude di e electorado for di mundo.

 

 

 

  • Powered by SETAR