Homber sentencia na 5 aña di prizon pa a viola dos menor di edad

ORANJESTAD – Corte a sentencia e homber J. Trimon na un castigo incondicional di prizon di 5 aña diabierna mainta. Corte a haya proba, cu e sospechoso durante dos aña a viola dos damita menor di edad, famia di su pareha, sexualmente. Asina huez a dicta den su veredicto. Bou di e pretexto di yuda nan cu tarea di scol, e la aparta nan den un camber separa, y a mishi cu nan di un forma no apropia, unda cu por papia di penetracion sexual. Huez a haya e declaracion di e damitanan creibel y confiabel. Ta considera hopi malo cu e sospechoso a abusa di su posicion y posiblemente causa posibel daño serio na nan desaroyo.  Den cuadro di esaki el a impone un castigo incondicional di 5 aña di prizon y mester paga e mamanan daño y perhuicio di 5 mil florin.  E caso a keda trata algun tempo atras, pa un huez di Corsou, ya cu e sospechoso ta relaciona cu famia di un huez na Aruba.