Partido POR ta exigi retiro di su mesun minister Lopez Tromp

ORANJESTAD – Minister Marisol Lopez Tromp tin te dialuna awor, 8 di juni 2020 pa entrega su funcion di minister y retira di partido POR. Asina Andin Bikker, actual lider interino di partido POR y tambe minister di Husticia a bisa diabierna mainta durante un conferencia di prensa urgente. Lopez lo no ta funcionando como minister segun e partido, y mencionando un lista di cosnan cu a bay robez, Bikker a bisa cu partido a dicidi diahuebs cu ta retira confiansa den su mesun minister. Si e no retira, Parlamento por entrega un mocion di desconfiansa y si e mayoria vota pro, e mandatario ta obliga pa retira. 

COSNAN CU A PASA

Segun Bikker, porta e drupel cu a pone e emchi pasa over, tabata e decision di Serlimar (compania cu ta resorta bou di e minister) pa pidi proteccion contra creditornan (surseance van betaling) recientemente. Segun Bikker, e decision pa e compania tuma e decision aki ta crea precedente peligroso, sino cu ta necesario y cu por causa e compania su bancarota. Segun Bikker, lo a pidi surseance van betaling sin cu tabatin aanmaning na nomber di creditornan. Otro asunto cu ta un problema pa partido, ta e forma con Lopez Tromp a dicidi pa atende cu e asunto di Parke Arikok, cerando solamente cierto partinan di entrada pa e.o. ATV y UTV. 

INTERNAMENTE

Loke tabata un problema foi comienso di su funcion como minister for di ora cu Lopez a huramenta como minister fin di januari 2020, segun Bikker, ta cu Lopez Tromp no tabata comunica cu partido. Hopi decisionan tuma como minister, e partido tabata haya sa den prensa. Lopez Tromp lo no ta comunica cu e partido, no ta yega reunion of ta yega reunion laat. Como tal a haci intento hopi biaha pa logra remedia e situacion, pero esaki te na ultimo no a logra tampoco. Como tal e siman aki a dicidi pa ‘pull the plug’. Riba pregunta di noticiacla.com, Bikker no por a bisa ken ta e candidato cu ta reemplasa Lopez Tromp como mandatario. 

PASADO

Lopez Tromp tin un trayectoria politico unda cu despues di a forma parti di partido MEP, el a wordo saca for di partido, pa despues e forma partido di partido AVP. Aki tampoco cos a bay bon y el a tuma su retiro y a subi lista di partido POR. Como miembro di POR, el a asumi e tarea di lider di fraccion den e partido pa parlamento, pa despues e bira minister.