Mas of menos 500 hende na Aruba a vota caba pa Parlamentario Europeo

ORANJESTAD – Faltando un dia pa e dia di eleccion mes pa Parlamento Europeo, tin mas of menos 500 hende (di e 900 cu a registra) a vota na Aruba caba. Asina e representantenan na e oficina di representacion di Hulanda, VNO, a bisa NoticiaCla diaranson mainta. Manera ta conoci pa e eleccion aki cu ta oficialmente diahuebs, por a vota delanta caba. Diaranson mainta, manera tabata rutina ultimo dianan, trabounan di conteo delanta a cuminsa. Pero tur hende tin te diahuebs 3’or di atardi pa deposita nan voto. Pa 6’or posiblemente ta conoce e resultado pa Aruba, pero ta te diadomingo ta conoce e resulta total di e eleccion. 

CANDIDATONAN

Manera cu NoticiaCla a raporta luna pasa caba, esnan cu kier a vota na Aruba, tabatin te dia 11 di april ultimo pa registra. E dos partidonan politico mas grandi na Aruba, MEP y AVP cada un pues tin nan candidatonan cu nan ta sostene pa eleccion di Parlamento Europeo cu ta tuma lugar otro luna. Pa MEP, esaki ta Samira Rafaela (30) di D66, y pa AVP te cu dialuna, esaki tabata Karsten Klein (CDA), pero e ultimo aki a retira su candidatura. Mesora AVP a informa cu ta sostene e lider di partido Esther de Lange (44). E eleccion ta tuma lugar entre 23 y 26 di Mei proximo, pa cual lo eligi 751 miembro. De Lange ta un miembro parlamentario Europeo caba. Interesante ta cu Arubianonan tambe por vota pa e eleccion aki pero tabatin pues te cu diahuebs 11 di april 2019 pa registra pa esaki.