Gobierno a bolbe habri Caya Betico Croes pa trafico di motor

ORANJESTAD – Casi dos aña despues (18 di December 2016) cu gobierno anterior (Gabinete Mike Eman II) a habri Caya Grandi bek pa un periodo di 2 siman como prueba, awor ta gabinete Wever Croes a habri e Caya Grandi bek pa trafico, e biaha aki te cu fin di aña. Primiendo un boton riba un tablet prome, prome minister Evelyn Wever a cende e sistema di musica y despues a kita baricada pa habri e caminda. Y mescos cu gabinete anterior a haci, a usa autonan clasico tambe pa ta e prome auto cu ta trafica den e caya.  Caya Betico Croes ta habri pa auto pasa entre 6AM te cu 9AM y 6PM pa 9PM! E speaker nan den Caya Betico Croes a cuminsa resona musica di pasco! Speaker nan ta instala den full Caya Betico Croes cu diferente mensahe!

DESPUES DI 9 AÑA

Tabata 9 aña pasa cu Gabinete Mike Eman II a cera e caya, pa despues nan mes bolbe habri Caya Grandi pa trafico di auto -aunke pa un periodo limita y pa cierto ora. E tempo ey tambe e Gobierno a splica cu asina nan ta cumpli cu peticion di comerciantenan y ciudadanonan preocupa cu kier a mira un cambio. Gobierno a uza un ceremonia pa haci esaki, uzando autonan clasico.  E actual gobierno, e tempo ey den oposicion,   a mustra cu cu esaki no tabata un logro pasobra ta nan mes a cera caya. “Pues no por a bin aworaki y haci como gobierno a haci algo grandi”, nan a bisa dos aña pasa.