Caya Grandi a habri bek pa auto despues di 7 aña

ORANJESTAD – Despues cu nan a cer'e 7 aña pasa pa introduci e tram, gabinete Mike Eman II a bolbe habri Caya Grandi pa trafico di auto -aunke pa un periodo limita y pa cierto ora- dialuna anochi. Gobierno a splica cu asina nan ta cumpli cu peticion di comerciantenan y ciudadanonan preocupa cu kier a mira un cambio. Gobierno a uza un ceremonia pa haci esaki, uzando autonan clasico.  

TEMPORAL

E acceso aki lo ta posibel durante un periodo di prueba di dos siman, este te cu dia 1 di januari 2017. Despues di esey lo cera caya atrobe pa haci un evaluacion di e resultadonan cu a proporciona na comercio, como tambe e efectonan riba e infrastructura di Caya Grandi. Basa riba esaki Gabinete Mike Eman lo tuma un decision definitivo. NoticiaCla.com a tuma nota cu mayoria tienda den Caya Grandi ta totalmente cubri cu seya hero, of rolluiken, y cu apenas 23 tienda ta visibel pa por logra e efecto di 'windowshopping' manera cu gobierno kier logra awor. 

LOGRO OF NO?

Oposicion a mustra cu cu esaki no ta un logro pasobra ta nan mes a cera caya. Pues no por bin aworaki y haci como gobierno a haci algo grandi.